Shillong,Nailar, 01: Ar ngut ki briew kynthup ruh ïa uwei u nongkhaii drok ki la shah kem ha West Jaiñtia Hills District ha ka sngi Thohdieng.
Da ka jingïoh jingtip na ki tnat syntiat, ki Pulit ki la ïoh bat ïa u Kmenlang Dkhar katba u dang mih na Kalaiñ, Assam ban leit sha Jowai.
Na ka met jong u, ki Pulit ki la ïoh kurup 12.33 gram u drok heroin, ki synduk thep sabon bad ka mobile phone.
Da ka jingphla jong u Kmenlang Dhar, ki Pulit ki la thwet bad ïohkem ïa u Rudy Sutnga, u nongkhaii drok bad u nongbei pisa ïa u drok ba la ïoh kurup, uba sah ha Mynthong, Jowai.
Ki Pulit ki dang trei shitom shuh shuh ban ïohkem sa ïa kiwei pat kiba donkti ha kane ka kam khaii drok na Assam bad na Meghalaya.
Ïa ka case la register hapoh ka Narcotic Drugs and Psychotropic Substances (NDPS) Act.
