Shillong, Naitung 25 : U MP ka Shillong, Dr. Ricky AJ Syngkon ha ka sngi Thohdieng u la kynduh ïa u Myntri Kampohiing ka Ri, u Amit Shah ban kyrpad ïa ka jingtuklar jong u na ka bynta ka jingdawa pyntreikam noh ïa ka Inner Line Permit ha ka jylla bad ruh ban pynrung ïa ka Ktien Khasi ha ka Khyrnit kaba Phra ha ka Riti Synshar jong ka Ri.
Ha ka dorkhas sha u Amit Shah, la ong ba u MP u la kyrpad ïa u Amit Shah ban ai noh ïa ka ILP ha Meghalaya da kaba kdew ïa ka jingsyier na ka jingwan rung kyrthlep ki mynder kaba buh jingma ïa ki trai ri trai muluk.
U la kdew ruh ba ka jingdon ka ILP kum ha ki jylla ba marjan kata kum ha Arunachal Pradesh, Mizoram bad kumjuh ha Manipur bad Nagaland ka paw ba ki long ki lad ai jingïada kiba paka bha na ka bynta ban tehlakam bad pyrkhing ïa ka rung ka mih jong ki briew kiba nabar bad ïada pat ïa ka jinglong tynrai jong ka jylla.
Ha kajuh ka por u MP u la kyntu ruh ïa u Amit Shah ban tuklar lang na kabynta ban kynthup noh ïa ka Ktien Khasi ha ka Khyrnit kaba Phra jong ka Riti Synshar jong ka Ri. U ong ruh ba ka Ktien Khasi kadei kaba la kren da kiba bun ki nongshong shnong ka jylla hynrei haduh mynta kam pat ïoh ïa ka jingithuh hapoh ka Khyrnit kaba Phra.
Ha kajuh ka por u la kyntu ruh ïa u Myntri Kampohiing ban plie ïa ki lad ïohkam na ka bynta ki samla ka jylla ha ki tnad kam shipai kiba don ha ka jylla khamtam kiba ïadei bad ki jait kam ha ka Group C bad kiwei ki jait kam.
Nalor kine, u MP u la rah bad pynsngew ruh shibun bha ki ishu kiba ïadei bad ka jylla.
