Jowai, Naitung 24 : Ka Jaiñtia Hills Autonomous District Council (JHADC) haduh mynta ka hap ban siew haduh T.8,45,59,679/- tyngka shibnai na ka bynta baroh ka tulop jong ki 1149 ngut ki nongtrei ka Council kynthup lang ïa Pensioner bad ki Ex MDC, ïa kane la jubab da u CEM kma Thombor Shiwat ha ka jingkylli bala wanrah da u ma Madonbai Rymbai (MDC) ka Congress ha ka Dorbar lyiur kaba la long mynta ka sngi.
U ma M.B. Rymbai ula pan jingpynshai haduh katno bnai ka tulop jong ki nongtrei bad kiwei de kaba dang sah haduh mynta, la jubab kaba dang sah ka long sa Hynñiew (7) bnai bad lai (3) bnai na ka bynta ki MDC ba thymmai.
Ula pan jingkheiñ katno tylli ki Beat Office kiba pynïaid da ka Council hapoh ka tnad Forest, la jubab ki don lai tylli kata ka Ratacherra Beat Office, ka Mookyndur Beat Office bad ka Garampani Beat Office ïa kine la aiti sha ki riew shimet. U CEM ula ong na ka bynta ka jingbha jingmiat ha kine ki sngi ban wan, na ka liang ka EC kan sa shong pyrkhat ban leh ïa kaba donkam.
Katba u ma Rikut Parien (MDC) Congress ula buh jingkylli katno tylli ki Dorbar Shnong kiba hap hapoh ka jingpeit ka Jowai Municipal Board? La jubab da u ma EM ma A. Shadap ki don 20 tylli, kita ka Dulong, Chutwakhu, Panaliar, Loomiongkjam, Loompyrdi Iongpiah, Lion Mission Compound, Tpep-Pale, Khimusniang, Mynthong, Iawmusiang, Moosalangkat, Ladthalaboh, Loomsooiung Newhill, Corline Colony, Tyndo Wapung, Lumpariat, Mookyndup, Mooralong, Chilliang Raij bad ka Loomkyrwing.
Ha kaba kylli haduh katno tylli ki jait Kur kiba la wan ban pynpoi ïa ki kyrteng shapoh ka JHADC haduh mynta, la jubab ki don 236 tylli.
U ma Parien ula pynpaw ka jingsngewsih halor ka jingïoh jubab ba ka Indradhanush Gas Grid Ltd (IGGL) ka ïoh lad ban thep ïa ki Gas Pipeline khlem da ïoh jingbit NOC na ka Council. Na ka liang u Dy. CEM ula jubab ba kam long satia kumta hynrei ka Council ka la dep ban ai jingbit bad kiba bun ki jingïarap pisa (compensation) ka lait sha ki Dorbar Shnong.
