Mawkyrwat, ‘Naitung 23: Ka Mawkyrwat District Sports Association (MDSA) lyngba ka Football Committee mynta ka sngi ka 23 tarik u Naitung, 2025 ka la ïoh ban plie pyrda ïa ka lympumg ïalehkai kynjatbol kaba la tip kum ka Women’s Football League 2025 bad ka 1st Inter Office Football League 2025 ha madan Artificial Turf, MDSA, Nonglang, South West Khasi Hills District.
Lah ban kdew ba ha ka Women’s Football League 2025 ki don baroh 11 tylli ki kynhun bad ha ka 1st Inter Office Football League 2025 ki don baroh 22 tylli ki kynhun.
Haba phai ha ka jingïalehkai kaba dei ha ka Women Football League 2025, ka jingïalehkai ka la long hapdeng ka Marshilong Sports Club bad ka Mawthynrew Youth Sports Club ha kaba ki la ïa khaid khlem da ïoh ban ïa pynkhih jar wat kawei ruh. Nangta, ka jingïalehkai kaba bud pat ka Mawlangwir Sports Club ka la jop da 3 – 0 kol pyrshah ïa ka Sohkhyllam Sports Club.
Ha kajuh hi ka sngi la bteng ruh sa ïa ka jingïalehkai jong ka 1st Inter Office Football League 2025 kata hapdeng ka SP Football Team A pyrshah ïa ka Basin MBMA Football Team bad ha kane ka lympung ka SP Football Team A ka la jop da 6 – 0 kol ïa ka Basin MBMA Football Team.
Kiba la ïa donlang ha kane ka sngi plie pyrda ïa kine ki ar tylli ki lympung phutbol ki long naduh u bah Renikton Lyngdoh Tongkhar, MLA ka Mawkyrwat Constituency kum u kongsan, u bah B. Jyrwa, MPS, Superintendent jong ki Pulit, lem bad ki nongkitkam jong ka MDSA.
