Ong ‘EM’ ïa u drok, wei la pyrshang bad kyrni la eh ban bthat ïa u: S.J. Kharbhih

Mawkyrwat, Jylliew, 24: Ka ophis jong u District Mental Health Programme (DMHP) kaba hap hapoh ka ophis treikam jong u District Medical & Health Officer (DM&HO), South West Khasi Hills District ha ryngkat ka jingïatreilang bad ka ophis jong u Superintendent of Police, South West Khasi Hills District ka la pynlong ïa ka program ban rakhe ïa ka sngi pyrshah ïa u drok bad ka jingkhaïi be-aiñ ïa u ha kaba ïa kane ka program la pynlong ha Ïew Mawkyrwat, South West Khasi Hills District.
Ka jingthmu jong kane ka program ka long ban pynsngewthuh ha ki paidbah nongshong shnong ba kim dei ban ai lad ba u drok un kharoi ne un jyllei hynrei ki dei ban ïeng tylli ban pyrshah ïa ka jingpyndonkam ne jingkhaïi ïa u drok. Shuh shuh ki mat ba kongsan jong kane ka program ki long, ka jingktah u drok ïa ka koit ka khiah ha ka met bad ha ka jingmut jingpyrkhat ïa ki ‘riew shimet ba pyndonkam ïa u drok, ka jingktah ïa ka imlang sahlang, ka ïing ka sem bad ka shnong baroh kawei bad kumjuh ruh ki lad jingïarap kiba lah ban ïoh lada don kiba ngop kum ha kane ka apot.
Haba kren ha ka jingïalang, u Sub-Inspector (SI) jong ka Mawkyrwat Police Station, bah S.J. Kharbhih u la pynkynmaw ba ka jingrakhe ïa kane sngi pyrshah ïa u drok bad ka jingkhaïi be-aiñ ïa u ne ka “International Day Against Drug Abuse and Illicit Trafficking” ka dei ha ka 26 tarik u bnai Jylliew, 2022 hynrei namar ka jingïatyngkhuh ha ka Sngi U Blei la rakhe noh mynta ka sngi ha kaba la ïoh ban pynlong ïa ka jingïalang ha ïew Mawkyrwat khnang ba yn lah ban pynsngew ha ki paidbah ïa ka jingsniew jong u drok. Ha kajuh ka por u la kren ruh ïa ka jingsniew jong u drok bad lada don kino kino kiba donkam jingïarap ki lah ban leit sha ki Police Station ne kino kino ki jaka ban ïoh ki jingïarap kiba donkam.
“U drok u dei u kynja dawai ba pynbuaid bad ka pynlong ruh ïa u briew ban kyrni ha u bad ka pynlong ruh ba un leh ki kam ba pyrshah ïa ki aiñ bad bun ruh kiwei ki jingktah lada pyndonkam ïa u drok”, ong u bah Kharbhih bad ym tang kata, u drok u pynjot ruh ïa ka imlang sahlang bad ruh ïa ka pyrthei baroh kawei. Namarkata, “Ong ‘EM’ ïa u drok, namar wei la pyrshang bad kylla sha ka jingkyrni tang kata la eh ban bthat ïa u”, ong bah S.J. Kharbhih.
Ha ka jingkren jong u, u la pynshai ruh ïa ki katto katne ki aiñ kiba dei ha ka “Narcotic Drugs and Psychotropics Substances Act 1985” (NDPSA) kaba don ha ka section 42 kaba dei shaphang ki jingpynshitom lada u na ka briew ki pyndonkam, pynsaphriang, die ne shna ïa u droks. Namarkata, u la ban khia ba ki dei ban peit thuh ba lada don kino kino kiba la shah ngop ha u drok kin ïarap ban pyni lynti ne ban batai ïa ki lad jingsumar namar da jingïatreilang jong ki paidbah nongshong shnong yn lah ban ïaleh pyrshah ïa u drok.
Katba ka kong W.L. Marweiñ, Psychiatric Social Worker, District Mental Health Programme (DMHP) ka la kren halor ka jingktah u druk bad ki jait druk bad ïa ki katto katne ki lad jingsumar kiba lah ban ïoh lada u ne ka briew ki hap ha kum kane ka apot.
Ka NKD Wann Group ka la ai ïa ka jingbyrngia lyngba ka skit kaba ai jinghikai ruh ba kumno u briew lada u ngop ha u drok u pynkulmar ym tang ïa lade hynrei ïa ka ïing ka sem baroh kawei bad ruh ka batai ruh ba ki dei ban ïarap ban wad ki jingsumar kiba ïadei bad kane.
Ha kane ka sngi la ïoh ruh ka jingrwai kyrpang na ka District Mental Health Programme Team ka la ai kyrteng, “Ong em ïa u Drok” ba la thaw da u bah Batskhem Lyngdoh, Ward Assistant jong ka District Mental Health Programme (DMHP).