Ka tnad Pulit jong ka jylla ka dei kawei na ki tnad kaba la ïoh ïa ka nam ka burom ym tang hapoh ka jylla hynrei wat shabar ka jylla ruh khamtam lei lei hadien ba ki la ïoh kem lut ïa baroh ki briew kiba donkti ha ka jingpyniap ïa u Raja Raghuvanshi hajan ka Wei Sawdong. Nalor kata lada phai mynta ki Pulit ki la sdang bha ban ïoh ïa ka jingshaniah bad ïatrei lang na ki paidbah ha ka jingïaleh bad ïakhun pyrshah ïa kino kino ki kam sniew khamtam ïa u drok.
Hynrei ka jingleh tam bad jingbym ïohi jngai jong uwei ne arngut ka ktah ïa ka burom bad ka iktiar jongka Tnad Pulit baroh kawei. Kum ka nuksa ka jingjia ha Sohra kaba la jia ha ka 3 tarik ha kaba ka kmie da ka jingshaniah ka la leit ïalam ïa u khun sha Sohra Police Station hadien ba u la shah thwet ha ki bor pulit namar ka kam ïashoh ïadat briew jongu. Ka kmie ka leh ïa kane da kaba kohnguh ïa ki bor ka aiñ kiba bthah ba ka dei ban wan ïalam ïa u khun sha Sohra Police Station. Hynrei phewse kane ka jingshaniah jongka ha ki bor ka aiñ ka la duh noh hadien ba ka la lap ba ka la shah shet kylla ha ki bor pulit namar hadien ba ka la wan shaw ïa la u khun na Police Station ka lap ba u la shah shoh bad shitom jur kat haduh ba kan hap ban leit ïalam ïa u sha Sohra CHC bad nangtei pat ki la bthah ba yn leit ïalam ïa u sha Shillong Civil Hospital.
Kane ka jingjia kam dei kaba la shu pynheh hynrei ka dei kaba la jia shisha namar kat haduh ban da hap shah sumar bad thiah hospital ka mut la dei ka jingshitom kaba kaba jur shisha. Hato kane ka jingleh jong uwei ne arngut na ki bor pulit kam ktah ïa ka tnad hi baroh kawei . Nalor kata ka kmie ym tang ba ka leit ujor shaduh u SP ka East Khasi Hills u bah Vivek Syiem hynrei ka la leit ban ujor shaduh ka Meghalaya Human Rights Commission. Namar kat kum ki bor ka aiñ ki pulit kim lah shuh ban shoh ban bom pynmynsaw ïa kino kino kiba shah kem. Khamtam une leit u samla u shah thwet tang namar ki kam ïashoh briew ym dei satia ba u la leh ïa kata ka kam pyniap briew ne ka kam runar kaba khraw tam.
Kumta halor kane ka jingjia na ka liang ki bor ba halor ka tnad pulit ki dei ban leh ei ei ban ai jingsneng ïa kito ki pulit kiba donkti ban shoh pynmynsaw ïa utei u samla hapoh Police Station khnang ba kan ym jia shuh nangne shakhmat. Namar lada kum kine ki jingjia ki ïai jia ha ka jaka ba ki paidbah kin ïatrei lang bad ki bor pulit , khlem pep kin duh noh ka jingshaniah ïa ki bor pulit bad haba la duh ka jingshaniah ka wan sa ka jingisih. Dei ka jingisih pulit ha ki por mynshwa ba tang shu don ki prokram jingïakhih jong kino kino ki seng kiba shah kawang maw nyngkong dei ki pulit namar ha kito pat ki por kiba leh tam bad pyndik ïa ki paidbah ki dei ki pulit CRPF. Kane ka la pynlong ïa ki paidbah ban sat sia ba tang shu ïoh lad ki la pynpaw beit ïa kaei kaba don hapoh. Hynrei mynta kato ka jingisih pulit ka la sdang ban duh noh na kata ka daw da don kino kino ki prokram jingïakhih ruh kam da don than shuh ka jingkulmar. Kumta ki bor ba halor ki pulit ki donkam ban tehlakam ïa kito kiba pynjah burom ïa ka tnad bad kiba wanrah ka jingisih jong ki riew paidbah ïa ki bor pulit khnang ba ka jingshaniah jong ki paidbah kan ïai bteng bad ïai neh shirta.
Ym lah ruh ban len ka jingshongsuk shongsaiñ ka wanphai ha ka jylla dei namar ka jingïatrei lang ki paidbah, ki bor shnong borthaw bad ki bor Pulit hynrei lada jia ba tang na i daw iba rit eh kine kin duh noh katno kan long ka jingktah ïa ka jylla ha ki liang baroh namar lada duh ka shongsuk shongsaiñ ka jylla ha ka jaka ba kan kiew ha ki liang baroh khamtam ha ka roi ka par, ka khaïi pateng lyngba ka jingkiew jong ka kam jngohkai pyrthei hynrei kan hiar pynban. Kumta ka sorkar kam dei ban kheiñ sting ïa ino ino i kam ba rit ruh. Ki bor ba halor ki dei ban leh ei ei ban pynpaw sha ki paidbah ba kim don jingmap ïa kiba leh tam wat la ki dei ki Pulit ruh. ïa kiba ïaid lait ïa ka aiñ wat la ki don ha ki uniform ne ha ka kam ruh ym dei ban ailad satia bad ym dei ban map namar ka aiñ kam ju map ïano ïano ruh.
