Shillong, Naitung 07: U Nongialam ka UDP bad u Myntri ka sorkar jylla u Bah Kyrmen Shylla u la pynpaw ka jingkyrmen ba ka party jong u kan sa leh bha ha ki elekshon ban sa wan na ka daw ki jingtrei shitom bad ki jingaiti ha kine ki khyndiat snem ba la leit.
Haba kren sha ki lad pathai khubor u Bah Shylla u la ong ba ki jingjop jong ka party yn sa sakhi hadien ki san snem, bad ki briew kin sa bishar ïa ki jingtreikam jong ki ha ka por elekshon.
U la pynpaw ruh ba ki jingjop jong ka party ha ka ban pyntreikam ïa ki skhim na ka bynta ki paidbah ka Meghalaya, khamtam ha ki district bad ki constituency jong ki.
“Kumba long mynta ki briew ki lah ban kynthoh pyrshah ïa kano kano hynrei kaei kaba shisha ka dei ka jingmih na ka jingtrei shitom ka ban pyni hadien ki 5 snem. Haba don ha ka sorkar ki la don bun ki jingjop. Nga la ïohi ba ngi la lah ban noh synniang shibun ki skhim sha ki paidbah ha la ki district bad constituency la jong. Baroh na ngi, ngi ïakhun ïa ki elekshon ban don hapoh ka sorkar, ban trei bha ha la ki jong ki constituency bad ha kajuh ka por ban leh bha na ka bynta ka jylla, kane kadei ka jingsdang jong ngi bad kawei shisha kaba ngi kwah ban leh bad ban nohsynniang,” ong u Myntri sorkar.
Haba kylli halor ka jinglah ban bujli ïa ka bhah long Myntri, u Bah Shylla u la ong ba kam pat shym la don kano kano ka jingïasyllok hapoh ka party halor kane ka kam bad kano kano ka rai dei ban shim da u President ka party.
Haba kylli la u la long uba kloi ban iehnoh ïa ka shuki Myntri, u la jubab da kaba ong, “Da ka jingkmen bad da ka monsngewbha ngan pdiang ïa ka jingtyrwa jong ka party. Ngan ym babe. Kan ym shim por ïa nga wat shi minit ruh ban shim ka rai namar nga kheiñ kordor ïa ka jingtyrwa ne kano kano ka sienjam ban sa shim da ka party. Nga don hangne mynta na ka daw ka jingkyrkhu kyrdoh ka party.”
U Bah u la banjur ka jingdonkam ka jingïatylli hapdeng ki MLA bad ki nongtrei ka party UDP, da kaba ong ba ki ju ïatreilang bad ïasyllok lang ïa kiba bun ki mat.
“Khlem artatien ngi la ïatreilang kum ka party. Ngi ïalong shipara. Baroh 12 ngut ki MLA ka UDP ki ïatreilang bad kano kano ka sienjam ba ngi shim ka dei da ka jingïasngewthuh jingmut lang jong baroh ki MLA bad ki nongtrei ka party,” u la bynrap.
U la kyntait ruh halor ka jingkynnoh ba ka don ka jingpyrshang ban bujli noh ïa u nongïalam ka party da kaba u ong, “Kata nga artatien. Naba ym don mano mano kiba la wan ban ïasyllok bad ngi, ngin ym lah ban pdiang ïa kata. Lada ki don kino kino ki jingeh, ka rynsan ka long kaba plie barabor. U president jong ngi, u kloi ban plie ïa ka rynsan na ka bynta jong ngi bad lada ngi don kano kano ka jingeh u ai ka lad ïa ngi ban ïasyllok ym tang haba long paidbah hynrei ha kaba shimet ruh phi lah ban ïakren bad u beit beit. Lada don mano mano kiba long pyrshah ïa u, ki lah ban wan sha nga, sha u Bah Paul, Bah Lahkmen ne kiwei ki MLA bad ki nongtrei ka party. Ki lah ban ïasyllok hapdeng jong ki bad ban pynshai ïa kito ki jingpyrkhat. Yn ym don kiba lah ban pynsangeh ïa ki ban synniang bad ban sam ïa ki jingmut jong ki.”
U Bah Shylla u la pynpaw ka jingsngewskhem ha ka jinglah ka party ban pynmih ki result ba bha bad ngeit ba ki nongshong shnong ka Meghalaya kin sa pynkup burom ïa ki ha ka elekshon u snem 2028.
