ïawer ka SELDD ïa ki nongmareh sha ka Shillong Run-10K 2025 ka ban long ha ka 02 tarik Nailar
Ka bai rung ka long: Ba napoh Jylla
15-18 snem Rs 400/- (Shynrang & Kynthei)
18- 35 snem Rs 800/- (Shynrang & Kynthei)
35- 45 snem Rs 600/- (Shynrang & Kynthei)
45- 55 snem Rs 600/- (Shynrang & Kynthei)
55 – 65 snem Rs 600/- (Shynrang & Kynthei)
65 snem shaneng Rs 600/- (Shynrang & Kynthei)
Kiba nabar
15-18 snem Rs 500/- (Shynrang & Kynthei)
18- 35 snem Rs 1000/- (Shynrang & Kynthei)
35- 45 snem 700/- (Shynrang & Kynthei)
45- 55 snem Rs 700/- (Shynrang & Kynthei)
55 – 65 snem Rs 700/- (Shynrang & Kynthei)
65 snem shaneng Rs 700/- (Shynrang & Kynthei)
SHILLONG, Naitung 07: Ka Social and Economic Life Development Department (SELDD) jong ka Khasi Jaintia Presbyterian Synod Sepngi lyngba ka Agency for Sustainable Development Initiatives (AfSDI) ha ka jingiatreilang bad ka Social Welfare Department, Govt. of Meghalaya kan sa pynlong biang ïa ka jingïakop mareh ha nongbah Shillong kaba 10 kilomitar lane ka Shillong Run-10K, 2025.
Kane ka Shillong Run-10K, 2025, kaba la buh ryngkat ka phang pdeng kaba ong ‘Run with different abilities’ la pynbiet ban pynlong ha ka 02 tarik u Nailar, 2025 ha ka por 5 shiteng mynstep ka ban sdang na Parking Lot, Polo.
ïa kane la pynbna da ki nongpynïaid jong ka Shillong Run 10K ba kynthup ïa u Rev SC Diengngan-Chairman jong ka Event Organising Committee, ha ka jingïadonlang u Rev R.P.L Nonglait-Secretary, Rev. Bidonbok Syiem-Convener bad u Bah Bining Lyngkhoi, Dkhot jong ka Event Organising Committee ka Shillong Run 10K.
Haba ai jingkren sha ki lad pathai khubor, u Rev. SC Diengngan u la pynshai ba ka jingthmu jong kane ka jingïakop mareh ka long ban pynsngewthuh ïa ki jingeh bad ïa ka jinglong ryngkat dor ki briew ba don jingduna haki dkhot met kumjuh ruh ban pynmih pisa ïa ki projek kiba ka Synod ka la seng na ka bynta ki khynnah kiba don jingduna ha ki dkhot met, kata na ka bynta ka Mairang Vidyajyoti Inclusive Secondary School, Mairang, Community Based Rehabilitation Centre, Mairang bad ka Rev. Amirkha School for Disabled, kaba ha Mawlai.
Naduh ba la sdang pynlong ïa ka ha u snem 2011 ka Shillong Run ka long kaba ïaid beit ïaid ryntih ryngkat ka jingwan ïashim bynta shitrhem jong ki nongmareh kiba naduh ki khynnah skul, samla, rangbah bad wat kiba la kham tymmen.
La pyntip ba ka jingpynrung kyrteng kan long lyngba ka Online na ka bynta kino kino kiba don jingthmu ban ïashimbynta lyngba kane ka link https://forms.gle/wyDXRjYHvbfVFPT97 lane lyngba ka website www.afsdi.org lane https://www.afsdi.org shillong-run-2025. Ka bai rung kan long katkum ka kyrdan bad ka por ba khatduh kan long ha ka 28 tarik Naitung, 2025.
Na ka bynta kiba don jingduna ha ki dkhot met ka jingïakop mareh kan don tang ar Category kata hapoh ka 15 snem (Juniors) bad 15 snem shaneng (Seniors) bad kim donkam ban siew bai rung.
Ka lynti mareh na ka bynta ki Senior (10K): Ka Parking Lot, Polo-Lawmali, Community Hall Jaiaw, Lumpyllon – Jaiaw St Joseph, Jaiaw Chapel Road, Jaiaw Pdeng, Riatsamthiah, Wahingdoh, Umsohsun – G.S. Road, Khyndai Lad, DC Office, Raj Bhavan, Barik Point, Malki Point, Dhankheti Point, Don Bosco Square, Shillong College, Shillong Commerce, PGT College, B.K. Bajoria School, 4 th Furlong, Polo Bazar bad wanphai pat ha Parking Lot, Polo.
Ka lynti na bynta ki Under 15 bad na ka bynta kiba don jingduna ha ki dkhot met: kan sdang na Parking Lot, Polo Ground-Lawmali, Community Hall Jaiaw Lumpyllon, Jaiaw St Joseph, Jaiaw Chapel Road, Jaiaw Pdeng, Riatsamthiah, Wahingdoh, Umsohsun, G.S. Road, Khyndai Lad, Pegasus Hotel, Hotel Polo Tower bad wanphai pat ha Polo Parking Lot.
Kan don ruh ka khusnam pisa bapher bapher ïa ki nongjop bad yn sam takma sha baroh ki nongïashimbynta kiba lah pyndep ïa ka jingmareh ryngkat ka e-certificate. Ka khusnam pisa na bynta kiba 18-35 snem ha ka Open Category (shynrang bad kynthei) ka long: T.55,000 ïa kiba wan ba nyngkong, nangta T.35,000 bad T.25,000 ïa kiba wan ba ar bad balai. Katba ïa kiwei kiwei ki category ka khusnam kan long T.6,000 ïa kiba wan ba nyngkong; bad T.4,000 bad T.3,000 ïa kiba wan ba ar bad balai.
Yn sam Consolation Prize tang ïa ki kyrdan kiba hap hapoh 15 snem; 15-18 snem; 18-35 snem; bad ïa ki briew kiba don jingduna ha ki dkhot met na ka bynta kiba jop kyrdan ba 4 haduh ba 7. La pynbna ruh ba ïa ki T- Shirt yn sam kat ïa kiba wan kloi.
Na ka bynta ka jingtip kaba kham bñiah phi lah ban peit na ka Website www.afsdi.org. lane phone ha kine ki number: + 91 87875- 45266, + 91 89747- 61582 + 91 94365-57222.
La kyrpad ruh ïa baroh ki nongiashimbynta ba kin sngewbha ban wan shim ïa ki Bib Number bad ki Kits na ka office jong ka K.J.P Synod Sepngi kaba don ha Mission Compound (hajan ka skul K.J.P Girls Higher Sec. School) ha ka 31 tarik Naitung bad 01 tarik Nailar, 2025 naduh ka por 11 baje mynstep haduh 5 baje janmiet.