Mawkyrwat, Jylliew 23: Wat hadien shitaïew ba la don ka jing twa khyndew, hynrei ki paidbah ka shnong Mawpud hapoh ka thaiñ South West Khasi Hills ki dang don hapdeng ka jing jynjar namar kim pat lah ban leit ban wan namar ka jing shah khang lynti ka surok kali ban poi sha shnong.
U myntri ka shnong Mawpud u bah MacDonald Thongni u la iathuh ba ka jing ther u lapbah ha ka 16 tarik mynta u bnai ka la wanrah ka jing twa khyndew ha ki bynta ka surok PMGSY ha Lad Dom Mawleiï ka ba jngai kumba 5-6 km ka pyniasnoh ïaka shnong Mawpud hynrei haduh mynta ki paidbah kane ka shnong kim pat lah ban donkam ïaka surok namar haduh mynta ki bor badei khmih ia kane ka surok kim pat lah ban weng iaki maw bad khyndew ba khanglad ia kane ka surok.
“Watla ka jing twa khyndew ka la jia naduh 16 tarik hynrei haduh mynta ym shym la weng iaki maw bad ïaki khyndew ba khang ïaka surok ban poi sha ka shnong Mawpud bad kane ka buh jingeh ïaki paidbah khamtam haba ïadei bad ka jing kit ïaki marbam bad kumjuh ruh ban leit sha ki jaka sumar” la ong u bah Macdonald.
U bah Macdonlad u la ïathuh ba kane ka surok PMGSY kadei ba sdang naduh ka shnong Umpung bad ka ba pynïasnoh ïaka shnong Mawpud bad haduh mynta kane ka shnong ka dang don tang kawei ka surok naka bynta ban pyndonkam khamtam haba ïadei bad ka jing thied marbam kum na Balat lane na Ranikor.
U la ong ba namar ka jing bym shim khia ki bor badei peit ïa kane ka surok, ki paidbah nong shong shnong haduh mynta ki hap ban ïaid kjat da ki kynta naka bynta kit ïaki marbam ban pynpoi sha shnong.
“Ka jing twa khyndew ka la pynjulor ruh iaki mar rep bad ïaki Pipe um ba la tan naka bynta ban pynpoi um shapoh ka shnong” u la ong.
Shuh shuh u la ong ba kane ka jing bym pat lah ban weng ïaki maw bad khyndew ha kane ka surok ka buh jingeh khamtam haba ïadei bad ka jing donkam ban leit sha ki jaka sumar lane ban thied dawai kumno na Ranikor ne na Balat.
Halor kane u myntri ka shnong Mawpud u la kyntu ïaka tnat PWD bad ïa u MLA ka thaiñ u bah Pius Marweiñ ban shim khia halor kane ka jing weng noh ïaki maw bad khyndew ba khang lynti iaka surok ban poi sha shnong naka bynta ban pyllait ïaki paidbah na ka jingeh ha ki sngi ban wan” la ban biang u bah Macdonald.
