Carmel Lyngdoh
Shillong, Naitung, 06: Ka long ka jingjia kaba sngewsangsot ïa ki nongpang kiba leit shah sumar sha Aradonga PHC, kaba don ha West Khasi Hills District ha khappud ka jylla Meghalaya bad Assam namarba ka jingshah iehbeiñ jong ka PHC kaba pynlong ïa ki nongpang ban mad ïa ki jingeh.
Kane ka jaka sumar ba la pynïaid da ka Karuna Trust hapoh ka National Health Mission (NHM) lyngba ka Public-Private Partnership (PPP), ka la mad ka jingduh ba khraw na ka jingbym lah ban maramot ïa ka iing kaba la jot lut.
Ka Aradonga PHC ka shakri ïa ki palat 23,000 ngut ki paidbah na ki 70 tylli ki shnong, kynthup ruh ïa ki jaka ba jngai, ki jaka ba laitluid na ka jingtrei ka Sorkar Jylla bad ki bynta na Assam.
Ha ka jinglum jingtip da u nongthoh khubor uba leit jngoh dalade ïa ka Aradonga PHC, la lap ba ka la shah iehbeiñ haduh katta katta. Ka iing hapoh ka In-Patient Department (IPD), ka Store Room bad ka Operation Theatre (OT) ki la shah tap um ha ka slap kaba la ktah ruh ïa ki Electrical Fittings kum ki Ceiling Fan bad ki tiar ba donkam. Wat ka jaka sah ki nongtrei ruh kam da shngaiñ namar ka jingbym maramot jong ka Sorkar ïa ki iing.
Ki nongpang ki hap ban rah da ka shatri kup slap hapoh iing haba leit shah sumar ha ka por slap ba ka tnum ka pei um bad ka jaw um.
U Doctor In-Charge, Dr. S. Chadap, ula pynpaw ha u nongthoh khubor ba u ladep ban phah ïa ka shithi sha ka District Medical & Health Officer (DMHO), Nongstoiñ ha ka 30 tarik Jymmang 2025 ban dawa pynbha. U DM&HO ula jubab ha ka 5 tarik Jylliew da kaba pyntip sha u Sub-Divisional Officer (SDO), Nongstoiñ ban shimkhia hynrei haduh mynta ym pat ïohi dak eiei ruh em.
Uwei u nongtrei jong ka koit ka khiah u ong, “palat 50% ki shnong kiba hap hapoh kane ka PHC ki long kiba jngai bad kiba eh ban poi. Haba jot ka iing, jot ruh ka jingïarap Emergency bad ka jingai jingsumar manla sngi.”
Ka PHC Aradonga ka la shakri ïa ki 32 tylli ki shnong bad ïa ki nongpang na Riangdo CHC bad na Assam, kaba pyni ba ka long kaba kongsan tam na ka bynta ki paidbah khappud. Hynrei ka jingiehbeiñ jong ka Sorkar bad ka jingbym shimkhia ki bor ba dei peit ka la pynlong ba ka jingtrei ka tnad ka la sahkut.
Ki paidbah bad ki nongtrei mynta ki kyrpad jur ïa ka tnad ka koit ka khiah bad ki bor District ban shimkhia mardor.
Ka por slap ka dang ïai bteng, hynrei ka jingangnud jong ki paidbah na Aradonga ka long ban pynbha noh kloi ïa kane ka jaka sumar kaba long ka jingim jong ki paidbah kiba shong basah ha khappud.