Mawkyrwat, Jylliew 23: Ka long kaei kaei kaba pyndiaw mynsiem na ka bynta ki paidbah nongshong shnong haba wat hadein ba ki la pynsngew ha ki bor ba dei peit halor ka jingsniew palat ka surok kaba dei ïaid na Mawthawpdah – Laitlawsnai sha Rangdkhiew, South West Khasi Hills District.
Halor kane ka jingeh jong ki paidbah ha kaba ïadei bad ka ïaid ka ïeng lyngba ki kali, ha kine ki sngi ba la dep shwa ban wan u slap na ka liang ki nongñiah kali kamai bad ki paidbah Shnong ki la ïa mih ba ai khyndew tang ban long ban ïaid. Hynrei kaba sngewsih pat ka long ba hadien ka jingpynbha jong ki ka wan jia noh ka jinghap slap bad ka um slap ka la rong bad rah lut ïa ka khyndew ha kaba mynta lei lei ym long shuh shuh ban ïaid da ki kali rit namar ka surok ka don sa tang ki maw suda bad lada ïaid ka tyngkhuh ïa ki bynta jong ka khrum kali.
Namarkata, halor kane jingeh jong ki paidbah nongshong shnong ym don ba patiaw mano mano ruh wat hadien ba la dep ban pynsngew, kumta sa shi sien ki buh biang ka jingkyrpad ïa ki bor ha halor kum ka tnad PWD (Roads) ba ka dei ban sngap lem ïa kane ka jingkyrpad khnang ba ki paidbah kin nym ïa kynduh jingeh ha ka ïaid ka ïeng bad khamtam ha ka pang ka shitom.
