Da ka song pisa ryngkat ki jaiñ kup thiah, noh synñiang ki 30 ngut sha ka longïing ha Jashiar

Mawkyrwat, Jylliew 23: Kum ka dak jong ka jingsngewlem bad da ka mynsiem jong ka jingkitkhlieh ïa ki para-doh para-snam, mynta ka sngi na ka liang ka kynhun kaba don haduh 30 ngut ki dkhot ki la ïoh ban leit noh jingïarap da ka song pisa ryngkat ki jaiñ kup thiah ïa kawei ka longïing ha shnong Jashiar, South West Khasi Hills District.
Lah ban kdew ba kane ka jingleit ban noh synñiang jong ki, ka long hadien ba ka la don ka jingjia twa khyndew bad sah rong noh ïa ka ïing jong ki ha ka 16 tarik u Jylliew, 2022 ha kaba ka la don ruh ka jingduh ïa kawei na ki mynsiem briew ka (L) kong Hailsentimari Marweiñ bad kane ka longkmie ka la ieh shadien ïa ar ngut ki khun bad ïa la u lok jong ka u Arjun Myrthong.
Ha ka jingïalang ba lyngkot, u bah Robert Lyngdoh Marshilong, Myntri Shnong Jashiar u la ai khublei ïa baroh kiba la ïa don bynta ha kane ka kam leh isynei ba la saiñdur da u bah Staising Kharbteng ha ryngkat kiwei ki paralok jong u ban wan ha shnong jong ki ban ai ki ki jingïarap ïa kane ka longïing. “Kane kan long ka nuksa ba bha ïa kiwei ruh ban buddien bad haba ki shakri ïa ki para briew ka long ruh ka bynta ba ki shakri ïa U Blei”, ong u bah Robert. Ha kajuh ka por u da kitbok kitrwiang ïa ki ba kin nangïoh ïa met ba koit ba khiah.
Ha ka jingkren jong u bah Staising Kharbteng ha ryngkat kiwei kiba la ïa noh synñiang ïa katei ka kynhun haba ki leit mynta ka sngi ha shnong Jashiar u la ong ba wat la kim dei ki trai shnong kane ka ka thaiñ, hynrei ki pynpaw ba ki dei ban don ha syndah ki paradoh parasnam ban ai mynsiem bad pyntngen ïa ki ha kum kane ka jingjia da kaba weng sharud ïa ka jingsngewpher dong ne thaiñ.
U la ong ruh ba ha kane ka jingleit noh synñiang ka long ha ka kyrteng jong baroh kiba la pynmih ïa u synñiang ba kynthup ïa 30 ngut kata naduh ki nongbylla sngi (mistrery ïing), ki nongñiah kali kamai, ki ASHA, ki Angawadi, ki nonghikai skul, ki nongtrei sorkar, ki ap pahara ha ki ophis bapher bapher, ki nongïalam ñiam bad kiwei kiwei kiba dei na kylleng sawdong jong ka Ri Khasi.
U bah Staising Kharbteng u la ai mynsiem ïa u kurim jong katei ka longkmie ba la khlad noh bad ïa arngut ki khun kynthei kiba dangrit ba kin shaniah beit ha U Blei Uba najrong wat hapdeng ki ummat ba ki ki la mad.
Namarkata, u la kyntu ïa kiwei ruh ban mih shakhmat ban leh ei ei ha kum kitei ki jingjia ba sngewsih ba wan jia ha ka imlang sahlang da kaba sangeh noh ki jingkynthoh tang ha rynsan social media bad dukan sha.