Shillong, Jylliew 29 : U Myntri Rangbahduh jong ka Ri, u Narendra Modi u la ong ba ki jaiñ ryndia ba pynmih na ka jylla Meghalaya ki la rah ïa ka burom jong ka ri ban long kum kiwei na ki jaiñ thaiñ kti kiba la ïoh ïa ka jingïaroh na kylleng ki bynta jong ka pyrthei.
Ia kane u Myntri Rangbahduh ka Ri u la pynpaw ha ka jingkren jong u lyngba ka Maan Ki Baat ha kane ka sngi U Blei.
Shwa kane, u Modi u la ong ba ki jaiñ ryndia kim dei shuh tang ka jaiñ hynrei ki la dei ka nongmuna jong ka Meghalaya kaba la ri bad sumar kyndong na kawei ka pateng sha kawei pat. U la pynkynmaw ruh ba dang shen ka Ryndia ka la ïoh ruh ïa ka shap ba pawnam, kata ka Geographical Indication (GI) Tag.
Katkum ka jingong jong u, ka jingdawa mynta ia kine ki jait jaiñ ka jur bha ha ka pyrthei namar ki dei ki jait jaiñ kiba ym ktah ïa ka mariang. “Kumta ki jaiñ ryndia na Meghalaya ki dei kiba ïahap dur bad biang eh na ka bynta ki iew ha ki ri jong ka pyrthei,” u la ong.
U Myntri Rangbahduh u ong ruh ba kine ki jait jaiñ ki ïarap ban pynneh ia ka jingsyaid ha ka por tlang bad pyngad pat ha ka por lyiur. Kumta ki ïarap lut ïa ki nongpyndonkam katkum ka jingkylla ka suinbneng bad dei na kane ka daw u ong ba kan ïahap bha na ka bynta ki iew ha ka pyrthei.
Ha kajuh ka por u Myntri Rangbahduh u la ai ruh ka jingïaroh ïa ki longkmie jong ka Meghalaya kiba la lamkhmat ha ki Self Help Group ban kyntiew shuh shuh ïa ka jingpynmih ïa kine ki jaiñ ryndia da kaba buh hakhmat ban kyntiew ruh ïa ka kamai kajih bad ka ïoh ka kot.
U la ai khublei ruh ïa ki paidbah ka Meghalaya kiba la ïoh ïa katei ka burom kaba khraw bad kumta u la kyntu ïa ki nongshong shnong jong ka Ri India baorh kawei ba kin kyrshan lang ïa kitei ki tiar kiba pynmih hi da ki nongseng kam lajong.
Nangta u ong ruh ba lada ki paidbah bad ki nongkhaii ha ka ri ki kyrshan da kaba thied tang ïa ki tiar kiba shna ha India, ka jingïa kyrshan lang kan long khlem sangeh bad yn ym don shuh mano mano ruh ba lah ban pynsangeh.
