Shillong, Jylliew, 22: U Superintendent of Police ka East Khasi Hills District u Bah Sylvester Nongtnger ha ka sngi Baar u la phah ïa u kyrwoh sha baroh ki samla lud kiba dang khie dang san ka East Khasi Hills District ba kim dei satia ban shah pynngop ha ka jingdih drok uba pynjot ym tang ïa u ne ka nongdih hynrei ka ktah ruh wat ïa ka ing ka sem, ïa ki marjan marpan, ki paralok ki parajor.
“Ka jingim ka dei kaba kongsan, wat shah pynngop ha ka jingdih ïa u drok,” ong u Bah Nongtnger shwa ban kaweh lama ïa ka jingïaid rally ba la ïashim bynta da ki dkhot ka The Ultimate Legend Bikers Association (TULBA).
Ka jingpynshai paidbah jong ki Pulit ka East Khasi Hills District ïa ka jingshyrkhei jong u drok ka long kum shi bynta ban rakhe ïa ka International Day against Drug Abuse and Illicit Trafficking, da kaba ïatreilang bad ka TULBA kaba la pynsaphriang ïa ka khubor ban ïakhun pyrshah ïa ka jingkhaii be-aiñ bad ka jingdih drok da kaba ïaid rally da ki thuk tuk na phyllaw ka Inster State Bus Terminus (ISBT) Mawiongrim, ter ter haduh Madan Iewrynghep, Laitumkhrah, Shillong.
U Bah Nongtnger u la ai khublei ïa ki dkhot ka TULBA kiba la pynlong ïa kane ka jingïaid rally da ki thuk thuk ban pynshai paidbah halor ka jingpyndonkam be-aiñ ïa u drok bad ka jingkhaii be-aiñ ïa u drok.
U la kyntu ïa kane ka kynhun ban long ka nongrah khubor sha ki samla ba kin kiar raimaw raidieng na kaba shah pynngop ha ka jingdih rok.
Shuh shuh u la kyntu ïa ki kmie ki kpa, ïa ki paidbah salonsar ba ïatreilang bad ka tnat Pulit ban ïakhun thma pyrshah ïa ka jingdih drok bad ka jingkhaii be-aiñ ïa u drok, da kaba ong, khlem ka jingïatreilang jong ki paidbah ki Pulit marwei kin ym lah ban pynsangeh ïa ka jingkhaii be-aiñ ïa u drok.
