Pynsangeh ka Ïingkashari ïa ka rai ka EC VPP ïa ka kam thungkam pura ïa ki 30 ngut ki nongtrei

Shillong, Jylliew 23: Ka Meghalaya High Court ha ka sngi Nyngkong ka la pynsangeh shipor ïa ka hukum ba la pynmih da ka Executive Committee ba ïalam da ka Voice of the People Party (VPP) ha Khasi Hills Autonomous District Council (KHADC) kaba kheiñ ïap ïa ka hukum thungkam pura ne regularization ïa palat 30 ngut ki nongtrei casual.
Ka hukum ka KHADC ba la pynmih ha ka 30 tarik Jymmang, 2025, ka la shah pynsangeh ha ka Ïingkashari hadien ba hynriew ngut ki nongtrei, kynthup ïa 4 ngut ki Junior Engineer bad 2 ngut ki Junior Architect, kila leit tynjuh pyrshah ïa ka hukum jong ka Council hakhmat ka Aiñ.
Kine ki nongmudui ba kynthup ïa u Bah Wallamjinghun Nongsiej, Andrew Mulieh, Moodifield Lyngdoh, Lariboklang Marbaniang, Dale-Mid-Gift Marbaniang, bad Saffiona Dkhar, kila shah thung kam pura hadien ba ki pyndep ïa ka kam contract ba palat shisnem Hynrei ka EC ka KHADC ka la kheiñ ïap ïa ka hukum thungkam pura jong ki ha ka 30 tarik Jymmang, 2025, khlem da ai kano kano ka jingpyntip lane ai ïa kano kano ka lad ban sngap lem ïa ki jingpynsngew kine ki nongtrei ba shah ktah.
Ïa u Bah Wallamjinghun bad Lariboklang ki la shah thung kum ki contract Junior Engineer ha ka 16 tarik Nailar 2023 katba u Andrew bad Moodifield kila shah thung ha ka 31 tarik Nailar, 2023 halor ka jingpynbna laitkam ba la pynmih ha ka 25 tarik Naitung, 2023 bad 22 tarik Nailar, 2023.
Hadien ba ki pyndep ïa ka jingshakri ba palat shisnem kum ki nongtrei contract, ïa ka jingshakri u Wallamjinghun bad Lariboklang la pynskhem ne thungkam pura noh kum ki Junior Engineer ha ka 24 tarik Kyllalyngkot 2025 katba ïa u Andrew bad Moodifield la pynskhem ne thungkam pura ha ka 1 tarik Risaw, 2024, kaba long katkum ka rai jong ka Executive Committee jong ka KHADC.
Ïa u Dale-Mid-Gift bad Safiona ki la shah thungkam ha ka 26 tarik Risaw, 2023 bad ha ka 20 tarik Nohprah, 2023 kat kum ka jingpynbna laitkam ba la pynmih ha ka 22 tarik Nailar, 2023. Ïa ka jingshakri u Dale Mid Gift la pynskhem ne thungkam pura kum u Junior Architect ha ka 1 tarik Risaw 2024 katba jong ka Safiona la pynskhem ne thungkam pura ha ka 24 tarik Jyllalyngkot, 2025.
Ha ka hukum ka Ïingkashari Single Bench ba la khlieh da u Justice B Bhattacharjee ka la shem ba ka Office Order (KHADC) ba la tynjuh, kam shym la pynpaw satia ba ki aplai ki la ïoh ïa ka notice lane ai ïa kano kano ka lad ban sngap ïa ki hashuwa ka rai ban kheiñ ïap ïa ka jingthungkam pura ïa ki kum ki Junior Engineer.
La ong ruh ba watla ha kane ka hukum ba la tynjuh, la pynpaw ba ka jingthungkam pura ïa ka jingshakri jong kine kiba aplai ka long shabar jong ka rule kum ka daw ba kheiñ ïap noh ïa ka jingthungkam pura ïa ki, hynrei ym shym la don kano kano ka jingbatai ban pyni ba kiei kita ki kyndon jong ka rule ba ym shym la bud haba thungkam pura ïa ka jingshakri jong kine kiba aplai.
“Namar kata, kumba long mynta la sngew ïahab ban sospon shuwa ïa ka jingtreikam jong kane ka hukum ka KHADC ba 30 tarik Jymmang, 2025 tad haduh ka sien shong bishar ka ban wan,” pynpaw ka Ïingkashari.