Washington, Jylliew 22 : Ka United States ka la mih lang ha ka thma jong ka Israel pyrshah ïa ka Iran ha ka step jong ka Sngi u Blei da kaba pynhap haduh 30,000 pound u bom ha ka ktem kaba don bun bha u mar Uranium kaba don hapoh u lum. Kane ka jinghiar thma kynsan ka la don ruh ha ka jingma ba ka lah ban nang pur ka thma hadien ba ka Iran ka la maham lypa ïa ka US.
Ka US ka la siat ruh da ki phew tylli ki missile bad na ka liang u President Donald Trump ha ka jingkren lyngba ki television na White House u la ong ba kine ki jingkhyrwit ki long ha ki lai tylli ki ktem nukliar. Tangba ha kajuh ka por ki heh ka tnad Ïada ri jong ka US ki la ong ba mynta ki dang lum jingkhein ïa ki jingjulor kiba mih na katei ka jinghiar thma.
Hadien katto katne kynta hadien kane, na ka liang u Myntri ki Kam barri jong ka Iran, u Abbas Aragachi u la ong ba ka por mynta ka la poi ba ka Ri ka hap ban ïada ïalade. U ong ruh ba shen un leit sha Moscow na ka bynta ban ïa kren bad ri Rurssia halor kane.
“Ki la tam ïa u dak sam da kaba hiar thma ïa ki jaka ba don nukliar,” u la ong.
Ka Atomic Energy Organisation jong ka Iran ka la pyntikna ba ka jinghiar thma ka dei ha Fordo bad Natanz bad ruh ha ka Isfahan nuclear site. Hynrei ka pynpaw pat ba ki kam nukliar jong ka kin ym sangeh satia. Baroh ar tylli na ka liang ka Iran bad kumjuh na ki nongpeitngor ka UN ki la ong ba kam pat don satia kano kano ka dak ba kan don ka jinglait ki lyer bih ha kitei ki lai jaka hadien ba la dep ban ther bom.
Bun ki ri ka pyrthei ki la mih bad kyntu ban khot sha ka jingïakren khnang ba kan ym don shuh kano kano ka jingïa pyni bor bad hiar thma.
Watla kam pat shai la ka US kan bteng ban khyrwit ïa ka Iran ryngkat bad ka Israel kaba la don ha ka thma pyrshha ïa ka Iran mynta la khyndai sngi. Hynrei na ka liang u Defense Secretary ka US u Pete Hegseth u la ong ba ka US kam kwah ïa ka thma bad ka jinghiar thma ka long kaba ym lah ban tip lano kan kut watla na ka liang u Trump u la dep ban pynpaw ba kan bteng biang ka jingther bom lada jia ba ka Tehran ka pynphai kylla.
Khyndiat kynta hadien ba ka US ka la dep ban khyrwit, na ka liang ka Iran lyngba ka Paramilitary Revolutionary Guard, ka la kam ba ki la dep ban khyrwit kylla haduh 40 tylli ki missile ïa ka Israel kynthup ïa ka Khorramshahr-4, kaba dei ka ktem bah. Halor kane, na ka liang ka Israel ka ka lam ba ki la don 80 ngut ki briew kiba la mynsaw malu mala bad kawei ka iing bun mala ha Tel Aviv kaba la julor.
Hadien, na ka liang ki shipai Israel ki la kam ruh ba mardor hi ki la khyrwit kylla ïa ki tiar siat missile jong ka Iran.
Ka Iran ka la pynpaw bad ïai ban da kaba ong ba ki prokram nukliar jong ka ki dei beit na ka bynta ka jingsuk bad ba ki tnad syntiat jong ka US ruh ki la lap ba ka Tehran kam shym la thmu ban pynbthei da u bom. Hynrei na ka liang u Trump bad ki nongïalam Israel ki la kam ba ka Iran ka lah ban khyrwit da ki tiar nukliar kaba lah ban buh ka jingma kaba khraw.
