Hadien 10 sngi ka jingtohkit, poi ka Sonam bad u Raj sha Judicial Custody na bynta 13 sngi

Shillong, Jylliew 21 : Ka Iingkashari ha kane ka sngi Saitjain ka la pynngat 14 sngi ïa ka Sonam Raghuvanshi bad ïa u baieid jong ka, u Raj Singh Kushwaha, sha Judicial Custody hadien ba ka kynhun tohkit ba kyrpang ne ka Special Investigation Team ka la pyndep ïa ki 10 sngi ka jingtohkit ïa ki halor ka jingshah pynïap u lok jong ka, u Raja Raghuvanshi dang shen ha Sohra.
Ïa ki suba ba donkti, kata ïa ka Sonam bad u Raj la ïalam biang ha kane ka sngi Saitjain sha Ïingkashari hadien ba ka por ha police custody ka la kut. Katkum ka jingïathuh da u Assistant Public Prosecutor u Tushar Chanda hadien ba la mih na Kashari Chief Judicial Magistrate, la ïathuh ba ïa kine baroh arngut la phah sha Judicial Custody na ka bynta 13 sngi.
U Chanda u la pyntip ba ki pulit ka jylla kim shym la pan shuh ban pan ïa kine ki arngut kiba suba donkti ha katei ka kam ban dang don ha police custody.
Dang ha ka sngi Palei, lai ngut kiwei pat kiba shah kynnoh donkti lang ha katei ka kam pynïap ïa u Raja, ba kynthup ïa u Akash Rajput, u Vishal Singh Chauhan bad u Anand Kurmi, la phah ïa ki sha Judicial custody na ka bynta 14 sngi.
Bad dei ha ka sngi Ba-ar ba ka SIT ka la pyndep ïa ka jingpynwandur biang halor ka jingshah pynïap ïa u Raja ha Sohra kaba la pynlong ïa ki ruh ban lap sa kawei pat ka tiar pynïap na Weisawdong.