Khang internet ha ka por ba don ki eksam ïakhun kam sorkar, dawa ka JSU na u Dy.CM

Shillong, Jylliew 18 : Ka Jaintia Students’ Union (JSU) ka la dawa na ka sorkar ba kan shim ïa ki lad ki lynti kiba tyngeh kynthup ban khang shipor ïa ka internet ban pynthikna ba ka jingpynlong ïa ki eksamin ïakhun kam sorkar kan long kaba khuid bad kaba shai.
Katkum ka jingong jong ki, ka Seng ka la ïoh pdiang ïa ki jingujor na ki tyllong bapher bapher kiba kynnoh ïa ki jingleh thok bad jingleh bym hok kiba la jia ha ka por ba don ka eksam ïakhun kam sorkar ha ki katto katne ki jaka lyngba ka jingpyndonkam ïa ki mobile phone.
Ha ka shithi sha u Symbud Myntri Rangbah ba peit ïa ka tnad Kampohiing ka Ri, u Bah Prestone Tynsong, na ka liang ka JSU ka la ong, “Ngi ngeit skhem ba ka jingpyntreikam ïa ka jingkhang shipor ïa ka internet ha ki sngi ba pynlong ïa ka eksam ïa khun kam sorkar ka lah ban tehlakam ym duna ïa ka 50–60 persen ki kam leh thok kaba ju lah ban leh lyngba ka jingïarap ki kor internet.”
“Khamtam eh, ha kane ka juk jong ka Artificial Intelligence (AI), ki lah ban pyndonkam bakla ban thok ha ka por eksamin. Da ka jingïarap jong ki smartphone, ki smartwatch, lane ki tiar ba la buhrieh, ki kyrtong ki lah ban ïoh da kaba suk ïa ki apps AI lane ki chatbots kiba ai ïa ki jubab kiba thikna mardor,”, ong ka kyrwoh na ka Seng.
Da kaba banjur ïa ka jingdonkam ban don ka jingpyrkhing kaba jur bad jingpeitngor bha ha ki jaka eksam, ka seng ka la ong ba dei ban pynjari ïa ka rukom talasi kaba pyrkhing bha ha ki khyrdop rung bad hapoh ki jaka eksamin khnang ban lap bad khanglad ïa ka jingpyndonkam ïa ki tiar ban leh thok ha ka por eksam.
Ka Seng ka banjur ruh halor ka jingdonkam ban don ïa ki kor CCTV ha baroh ki kamra thoh eksam kaban long kum ka jingkhanglad ïa ki kam leh thok leh tuh bad wanrah ruh ka jingkhuid jingsuba ha ka jingïakhun kam sorkar.
“Khnang ban ïoh shuh shuh ka jingshaniah jong ki paidbah ha ka rukom thung kam, ngi ai jingmut ba dei ban buh ruh ïa ki CCTV ha ki por ba don ka interview ne ha ka por kylli jingkylli. Kane ka sienjam kan wanrah ïa ka jingtreikam kaba shai bad kaba khuid bad khanglad ruh ïa ka jingleh bym hok ne leh shilliang khmat,” ong ka kyrwoh na ka Seng.
“Ngi ngeit ba lada ka sorkar ka shim khia bha ïa kine ki lad jingïada bad pyntreikam hok ïa ki, kan ai jingmyntoi shibun ïa ki nongïakhun kam kiba dei hok ban ïoh bad kiba thrang shisha ban trei shitom ha kylleng ka jylla. Kan ïarap ruh ban pynïoh biang ïa ka jingshaniah hapdeng ki samla bad ki paidbah ha ka rukom thung kam bad ha ka jingtreikam jong ka sorkar,” la bynrap shuh shuh ka kyrwoh.