Shillong, Jylliew 18 : Ka United Democratic Party (UDP) shen kan sa jied noh ïa u General Secretary ba thymmai jong ka hadien ba u MLA barim ka Nongthymmai, Dr. Jemino Mawthoh u la resaiñ noh na ka kam kum u nongïalam jong kane ka party.
Na ka liang u President jong ka Party, Bah Metbah Lyngdoh, ha ka jingïakren bad ki lad pathai khubor u la ïathuh ba shen mynta u bnai lane ha sdang jong u Naitung ka Central Executive Committee kan sa shong noh ïa ka jingïalang na ka bynta ban jied ïa u General Secretary ba thymmai.
“Ngi la dep ban pdiang ïa ka jingresain noh jong i Bah Jemino Mawthoh kumta shen ka CEC kan sa shong ïa ka jingïalang ban ïakren na ka bynta ka jingjied ïa u General Secretary ba thymmai jong ka party,” u la bynrap shuh shuh.
Ha kawei pat ka liang, une u heh ka UDP u la ong ruh ba ka CEC kaban wan ka la dei ban long mynta u bnai hynrei lada jia ba ym pat lah, lehse kan sa long ha ka taiew ba nyngkong jong u Naitung. “Ngim pat da kyrkieh than katta katta hynrei kum ka party pat ngi donkam ban don ïa u General Secretary,” u la ong.
U Bah Metbah u la ong ruh ba ka party ka la nang kiew stet bha bad kane ka la paw bad sakhi lyngba ka jingnang bun ki MLA kiba la nang bun ba ka party ka ïoh katba nang ïaid ki snem.
