Shillong, Jylliew, 18: Haduh 8,581 hajar na ki 13,940 hajar ngut ki samla ki la pas ïa ka eksamin Meghalaya Teachers’ Eligibility Test (MTET) na ka bynta ka Lower Primary bad 7,674 hajar na ki 12,136 hajar ngut na ka bynta ka Upper Primary. Haba kheiñ lang kiba pas baroh ki long 16,255 hajar ngut.
Ïa ka result la pynbna da ka Directorate of Educational Research and Training (DERT) ha ka sngi Baar.
“Ka pass percentage ka la kiew na ka 8.11% ha u snem 2023 sha ka 61.56% na ka bynta ka Lower Primary bad 9.27% sha ka 63.23% na ka bynta ka Upper Primary, ha ka eksamin MTET 2025,” la pyntip kaa DERT ha u kyrwoh.
“Ka pass percentage kaba 61.56% (LP) bad 63.23% (UP) ka pynpaw ïa ka jingkiew bha ka jingpas jong ki nongïaleh eksamin MTET hapdeng u 2019-2025,” ka la bynrap.
Ka jingkiew kaba paw ha ka jingpas bha jong ki nongïakhun eksamin ka long hadien ka jingwanrah ïa ka rukom pynkhreh ba janai kaba saw bnai.
Da kaba ithuh ïa ka jingduna shaba palat kiba pas ha ka eksamin MTET 2023, ka Examination Cell jong ka DERT ka la pynlong ïa ka jingbishar bniah kaba ryntih da ka jingïalam jong ka kynhun ki nonghikai kiba la don ka jingshemphang ha kaba ïadei bad ka jingbishar ïa ka pule ka puthi jong ki khynnah.
Ha u snem 2019, ka jingpas jong ki nongïakhun eksamin ka long 16.29% na ka bynta ka LP, 20.12% na ka bynta ka UP bad ha u snem 2021 – 15.40% na ka bynta ka LP bad 26.20% na ka bynta ka UP.
