Shillong, Jylliew 06: U MDC na Rongrong constituency u Rinaldo K Sangma u la pynrem jur ïa ka sorkar jylla ba la ïalam da ka National People’s Party (NPP) bad ïa ka executive committee ha Garo Hills Autonomous District Council (GHADC) halor ka jingkynnoh ba kam pat lah ban pynlait ïa ka tulop ba dangsah kaba la 40 bnai jong ki nongtrei ka council, ki doktor ba trei contract, ki nonghikai bad ki nongtrei casual ha ki tnat bapher bapher.
Ha ka kyrwoh khubor u Rinaldo u la ong, “Katba u Myntri Rangbah u dang bun kam ïalade ban pynsyrwa kai ïa ka pisa sorkar ha ki prokram kiba lut da ki klur ki klur ïa ki kam ki bym don jingmyntoi, hynrei ki nongtrei ka GHADC bad ka sorkar jylla ha ki tnat bapher bapher kim ïoh ïa ki tulop jong ki da ki bnai kaba la wanrah ruh ka jingeh ïa ki longïing longsem jong ki ban ïakynduh ïa ki jingjynjar ba har rukom hynrei ïa kane ym don kiba ïohi.”
“Ka long kaba sngewkhia shibun bha ba ki nongtrei ka GHADC ki khlem pat ïoh ki tulop jong ki mynta lah palat 40 bnai kumjuh ruh ki doktor ba trei contract, ki nonghikai hapoh ka deficit pattern, SSA bad hapoh ka 3F rule, ki nongtrei casual jong ki tnat bapher bapher ka sorkar jylla ki la hap ban mad ïa ki jingshah ai daw halor ki hok jong ki ba kidei ban ïoh ha kine ki bnai,” u la ong.
Haba ong ba ka jingkhot “double engine government” ïa ka EC ba la ïalam da ka NPP ha GHADC kaba don ka jingïatreilang bad ka sorkar jylla ka la kylla long pynban kum ka jingkit ba khia kaba ar shah ïa ki nongshong shnong, ong u MDC da kaba bynrap, “Kane ka jingïaibteng ban pulom jong ka sorkar jylla ba la ïalam da ka NPP ban pynlait ïa ka tulop kaba dei hok sha ki nongtrei kum ki doktor ba trei contract bad ki nonghikai ba la thung hapoh ka 3F rules, ki deficit bad SSA pattern bad ki nongtrei casual bad ka EC ba la ïalam da ka NPP kam shym la lah ban siew ïa ka tulop ki nongtrei ka GHADC mynta la palat 40 bnai dei ban pynrem da baroh.”
U la ong ba ka sorkar ka la pulom ban khmih ïa ka bha ka miat ki nongtrei paidbah hynrei ka kloi pat ban pynlut ïa ka pisa paidbah na ka bynta ki consultant bad ki political appointee.
“Kumta nga kyrpad ïa ka sorkar ba kadei ban pyllait noh ïa baroh ka tulop kaba dang sah sha ki nongtrei ka sorkar bad kumjuh ruh kiba trei ha GHADC,” u la dawa.
