Ki dieng ki dei ki bor ba ai jingïada ïa ka mariang bad ki sawdong sawkun jong ka: Wailadmiki

Shillong, Jylliew 05: Ka Committee on Environment jong ka Meghalaya Legislative Assembly ka la rakhe ïa ka World Environment Day da ka prokram thung dieng kaba la pynlong ha Secretariat Administrative Block jong ka Assembly kaba ha Khyndailad, Shillong.
Ha kane ka prokram la donlang u Deputy Speaker ka Meghalaya Legislative Assembly, u Timothy D Shira; nangta u Chairman jong ka Committee on Environment, u Bah Wailadmiki Shylla, MLA Jowai; ki dkhot ka Committee u Bah Ollan Sing Suin, MLA ka Mawsynram; u Commissioner & Secretary u Bah Andrew Simons; u Secretary u Malthus S. Sangma; u Chairman ka Lokayukta, u C.P. Marak; bad kiwei ki dkhot ba la shah jied bad ki ophisar ka tnat Forest, ki ophisar bad kiba la shah khot sngewbha.
Manla iwei pa iwei kiba la shah khot sngewbha ki la shim bynta ban thung ïa ki dieng hapoh ka jaka jong ka Assembly Secretariat compound. Ïa ki tynrai dieng la pynbiang da ka tnat Forest ka Meghalaya.
Haba kren ha kane ka sngi u Bah Wailadmiki Shylla, Chairman jong ka Committee on Environment, u la ong,
“Mynta ka sngi lyngba ka jingthung ïa ki dieng ki la ïasoh lang bad ka pyrthei baroh kawei ban rakhe ïa ka sngi pynneh pynsah ïa ka sawdong sawkun. Watla ka long ka prokram kaba rit, hynrei kane ka prokram ka rah ïa ka khubor kaba khraw. Ki dieng ki dei ki bor ïada ïa ka mariang, bad kane ka dei ka dak jingleh jong ka jingangnud jong ngi ban tyngkai, ban pynneh pynsah ïa ka sawdong sawkun. Ngi sngewkmen ban ïohi ïa ka jingdonlang u Deputy Speaker bad kiwei ki dkhot ba don burom. Lyngba kane, ngi kwah ban phah ka khubor kaba khlaiñ sha baroh ki nongshong shnong ka Meghalaya ba kadei ka kamram jong ngi ban ïada ïa ka sawdong sawkun bad ban ieh shadien ïa ka pyrthei kaba bha na ka bynta ki pateng ban wan.”
Haba ïadei bad ka jingdonkam ban pynïaryngkat hapdeng ki kam pynroi bad ka jingpynneh pynsah ïa ka sawdong sawkun, u Bah Shylla u la kynthoh,
“Ka kam pynroi bad ka jingïada ïa ka sawdong sawkun kadei ban ïaid lang. Ngi donkam ïa ki jingtei kiba long katkum ka juk kaba mynta, hynrei kam dei pat ban long halor ki jingduh jong ki tyllong kiba ka mariang ka ai. Ka sorkar jylla ka la pyntreikam ïa kiba bun ki kam bad kawei na kine ka dei ka Payment for Ecosystem Services, ha kaba ki nongshong shnong ki ïoh ki jingmyntoi ban ïada ïa ki khlaw ki btap. Ngi sngewskhem ba hapoh ka jingïalam jong u Myntri Rangbah u Conrad K Sangma, uba khmih ruh ïa ka tnat Forest ngin ïaibteng ban trei ki kam ban ïada ïa ka sawdong sawkun.”
Haba kren sha ki lad pathai khubor u Deputy Speaker u Timothy D Shira u la ong, “Mynta ka sngi, ba ka pyrthei ka rakhe ïa ka Environment Day, ngi phai sha ka ri India kaba la dep don lypa ïa ka tynrai jong ka jingsngewthuh halor ka sawdong sawkun. Ha ka por ba dang synshar u Syiem Ashoka ha ka snem 268 BC, la pynshlur ïa ki nongshong shnong ban thung ïa ki dieng ha shilynter ki surok na ka bynta ban ai ka jingïada bad ka ecological balance. Hynrei ka long kaba sngewsih ba mynta ki jaka ba long khlaw ki la sdang syllen lut. Kane ka prokram thungdieng kadei ka jingsdang kaba kongsan ban wanrah biang ka jingjyrngam bad ka buh ki nuksa ba khlaiñ ym tang ïa ki nongshong shnong ha Sor hynrei kumjuh ruh sha ki shnong ha nongkyndong.”
Katba u Commissioner & Secretary u Bah Andrew Simons u la ong, “Kan long ka kam kaba bha ba ha ka World Environment Day, ngi ïashim bynta ban thung ïa ki dieng. Ngi ai khublei ïa ka Environment Committee, khamtam ïa u Chairman u Bah Wailadmiki Shylla, u Deputy Speaker u Timothy D Shira, bad ki dkhot ka committee u Bah Ollan Sing Suin, ba ki la pynïaid shakhmat ïa kane ka kam. Ngi ai khublei ruh ïa ka jingkyrshan jong ka tnat Forest. Kane ka jingpyrshang wat la ka long kaba rit hynrei ka ai mynsiem ïa ka pateng ban wan ban pynpaw ïa ka jinglong kongsan ban pynneh pynsah ïa ki dieng.”
Na ka liang ka Committee ka la ïai pynskhem ïa ka jingangnud jong ka ban pynneh ban ïada ïa ka sawdong sawkun bad kyntu ruh ïa ki nongshong shnong ban ïashim bynta shitrhem ban thung ïa ki dieng ha ka jylla.