Jowai, Jylliew 05: Ka ophis u Deputy Commissioner, West Jaiñtia Hills District shi bynta ban leh burom ïaka sngi pynneh pynsah mariang ne ka ‘World Environment Days’ mynta ka sngi 5 tarik u jylliew kila pynlong da ka jingthung ïa ki tynrai dieng ha ki bynta jong ka Syntu Ksiar.
La sdang ïa kane ka jingthung tyngrai naduh ki bynta jong u mot Kiang Nangbah ter ter ka surok Jowai- Chyrmang haduh ba poi ka jingkieng Syntu Ksiar.
Ha kane ka sngi la ïashim bynta ha kane ka jingthung dieng naduh u Deputy Commissioner ka West Jaiñtia Hills u Abhinav Kumar Singh, IAS, ki ophisar sorkar, ki nongtrei ophis bad ki nongïalam shnong nalor kiwei de.
Ïa kane ka sngi la rakhe ruh ha Nangbah hapoh ka jingïalam jong u ma Cresentus Susngi MDC ka Nangbah Mihmyntdu ha ka jingïalang bala pynlong ha Madan thadmyntang Nangbah bad hadien kane la pynlong ka jingthung dieng.
