Shillong, Jylliew 05: Hadien shi snem duna ba u Jose Carlos Rodriguez Hevia u la bat ïa ka kam kum u nongïalam, utei u manager na Spain ula ïakhlad noh bad ka Shillong Lajong FC, katkum ka jingpynbna jong ka klob ha ki rynsan social media hynne ka sngi.
Une u manager na Spain u la ïasoh kum u coach ba rangbah duh ha u bnai Naitung 2024. Kane ka dei ka sien kaba ar jong u ha katei ka klob, hadien ba u la bat kam kum u Technical Director naduh u snem 2019 haduh ba un da mih noh ha ka por jong ka khlam Covid-19 ha u snem ba bud.
Hadien kane, u Rodriguez Hevia u la shimti ïa ka kam kum u coach ha u snem ba la dep, u la ïalam ïa ka Lajong sha ka semifinal jong ka Durand Cup, ha kaba ka SLFC ka la ïoh ïa ka kabu ban ïalehkai hala ïing ha Shillong.
Hynrei ka kynhun kam shym la lah ban bteng ïa ka rukom lehkai kaba seisoh jong ka ha ka I-League 2024-25. Ka SLFC kam shym la shah rem ha ki hynñiew sien na ki 9 tylli ki jingïalehkai ba nyngkong jong ka hynrei kam shym la pynkut ïa ka samoi ïalehkai ha ka rukom kaba khlaiñ bad ka la wan ha ka kyrdan kaba phra, kajuh ka kyrdan kaba ki la ïoh ha ka samoi 2023-24, ba la ïalam da u Bah Bobby L Nongbet kum u coach.
Ha ka jingthoh jong ka klob ha ka social media, ka Lajong ka la ong ba ka klob bad u coach ki la “rai lang ban ïakhlad noh.”
“Ngi sngewnguh shibun eh ïa u Coach Jose na ka bynta ka jingaiti, ka jingpyrshang bad ka jinglong nongïalam jong u ha baroh ka por ba u don bad Ngi. Ngi kitbok kitrwiang ïa u ba un nang jop ha baroh ki jingthmu jong u ha ka lawei,” la bynrap katei ka jingthoh.
