Shillong, Jylliew 02 : Ka jingïalang pyrkhat kam kaba lai jong ka High Powered Committee bad ka Supervision & Monitoring Committee ban pynkhreh ïa ki nongkilan met ka jylla Meghalaya na ka bynta ka 39th National Games 2027 kaba la khlieh da u Dr. Vijay Kumar D, IAS, Commissioner & Secretary jong ka Tnad Sports & Youth Affairs ryngkat bad ka Supervision and Monitoring Committee, kaba la khlieh da u Bah Diki D. Shira, MCS, Director Sports, ka la long ha ka 02 tarik Jylliew 2025 ha Main Secretariat, Shillong.
Katkum ka kyrwoh la ong ba kane ka jingïalang ka dei ka bynta jong ka jingpynkhreh jong ka Meghalaya ban pynkhreh ïa ki nongïalehkai ka jylla Meghalaya kiban ïa aireng ha ka 39th National Games ha u snem 2027.
Ha kane ka komiti ka jingïalang kaba la long bad iwei pa iwei baroh 8 tylli ki State Sports Associations lyngba ki jingïakren para marwei ban pynsngew halor ki jingpynkhreh jong ki.
Ki mat kiba hakhmat eh jong ka jingïakren ka long halor ka jingdonkam ïa ki briew, ki jaka kilan met, ki tiar ïalehkai, ka jingpynbiang ïa ka bam ba biang ia ki nongkilan met, ki jingïakhun kiba hap ban pynlong, ka jingjied ïa ki nongïalehkai ryngkat ka jingpyntip ïa ki jingpyndonkam da ki tiar ka juk stad mynta bad ka thong kaba hakhmat ka long ban ïoh khur takma.
Related Posts
Kham mynshwa kane kine ki Committee ki la dep pynlong ka jingïalang ar sien ha ka 21 tarik bad ka 29 tarik u Jymmang 2025 bad haduh 18 tylli ki State Sports Associations. Ki la dep ban ïa syllok bad kine ki ar tylli ki Committee. Kat haduh mynta ka sngi, 26 tylli ki associations kum ki Archery, Arm Wrestling, Athletics, Aquatics (Swimming), Canoeing & Kayaking, Badminton, Basketball, Boxing, Cycling, Football, Gymnastics, Judo, Karate-Do, Kho-Kho, Lawn Bowls, Muay Thai, Rowing, Shooting, Table-Tennis, Taekwondo, Tennis, Volleyball, Weightlifting, Wrestling, Wushu bad Yogasana ki la ïadon bynta ha kine ki jingïasyllok ki jingïakren shimet kawei pa kawei ka State Association.
La ïathuh ruh ba ki jingïalang jingïasyllok bad kiwei pat kiba dang sah yn dang bteng ha kine ki sngi ban wan.
Kitei ki ar committee ki la pynsngew ruh shaphang ka jingdonkam ban don ki jingpynkhreh kiba bniah ban da khmih bniah ba don bad ki nongrim kiba shai ban ïoh ban jied ïa ki nongïalehkai kiba tbit shisha kum shi bynta ban ïoh ka jingpynkhreh kaba bniah kaba janai ban kyrshan ïa ki State Sports Associations na ka bynta ka jingpynkhlain ïa ka kynhun jong ka jylla kaban mih sha ka National Games 2025.
Nalor u Chairman u Dr Vijay Kumar D, IAS, Commissioner, ki heh sorkar bad na ka liang ka MSOA kiba la ïadon bynta ha kane ka jingïalang ki kynthup ruh ïa u R. Yangthan, IAS, Joint Secretary, Sports, Diki Shira, MCS, Director ka tnad Sports, Bah John F. Kharshiing, Working President, MSOA, Kong Matsiewdor War Nongbri, Vice President, MSOA, Bah Finely L. Pariat, General Secretary, MSOA, Bah Ksan Warjri, Treasurer, MSOA, Bah P.B. War Nongbri, Assistant Director, Bah Phranki Pale, Senior Engineer, State Sports Council, Meghalaya bad kiwei ki ophisar bad ki technical staff.
Katkum ka kyrwoh la ong ba ki association kiba la ïadon bynta ki la ai ruh ïa ka jingbatai kaba bniah halor ka sports strategy bad ka jingdonkam ne requirement jong ki, kaba la pynbeit ban phah sha ka sorkar bad ki bor ba dei peit na ka bynta ka jingshim khia bad ka jingpynlong kaba biang ha la ka por.