Sohra, Jylliew 20: Ka 18 tarik u Jylliew, 2022 kan dei ka sngi ban sah jingkynmaw ïa ka thaiñ Sohra bad kumjuh ruh ïa ka ri Khasi hi shi tyllup namar dei ha kane ka sngi ba ka thaiñ Sohra ka la pynmih sa ïa uwei u myllung uba la noh synñiang sha ka thoh ka tar Khasi da ka jingpyllait paidbah jong u ïa ka kot kaba u la ai kyrteng “Khmih Pynor” – Ka Thup ki Poitry Khasi. Une u myllung u dei u rangbah Banlam Kupar Lyngdoh u ba dei u khun jong I Bah J Darningstone Lyngdoh (Bam kwai ha dwar U Blei) bad I Kong Dearlyness Lyngdoh na ka shnong Mawmluh, Sohra.
La pyllait paidbah ïa katei ka kot “Khmih Pynor – Ka Thup ki Poitry Khasi” da uProf.S.S.Majaw, u ba long u nonghikai ba la shongthait jong ka Khasi department, Synod College, Shillong ha ryngkat ka jingiadon lang u Babu Phasterwell Lyngdoh, u nonghikai ba la shongthait jong ka R.K.M.Higher Secondary School, Sohra ha ka hall jong ka jaka sah basa, The Vintage Grand, Saitsohpen, Sohra. La ïa don lang ruh ki sirdar bad riewrangbah na ka shnong Mawmluh bad Saitsohpen lem bad ki bahaing bahasem jong u nongthoh, ki para nonghikai na ka skul Ramakrishna Mission Higher Secondary School, Sohra lem bad ki paralok parajor kiba ia jan bad u nongthoh.
U Prof. S.S.Majaw, ha ka jingkren jong i la ai khublei ïa u nongthoh uba la sei madan ïa la ka sap kyrpang lyngba kane ka thup poitry Khasi, ïa ka jingtrei shitom jong u lyngba ki sngi bad ki snem ban thaw, ban shna bad pynwandur ia kine ki poitry ha la ki jong ki jong ki dur bad ki rukom. U la ong ruh ba ha kane ka juk mynta, ka jingpule ïa ki kot Khasi khamtam lei lei ïa ki poitry ka la hiar shaba palat. Ba ha ka rukom pyniaid jingpule jong ki Greek hyndai, ka Poitry ka shim ïa ka rynsan ka ba ar hadien jong ka Philosophy. U la ong ba ka poitry ka lah ban ai mynsiem ïa u briew shimet ne ia ka imlang sahlang bad ïa ka kam sainhima sainsima. Ula pynkut da ka ba ai mynsiem ïa u nongthoh ba un nang kiew shaphrang bad ban nang pynmih shuh shuh sa kiwei pat ki thup poitry ne jingthoh.
Ka kot “Khmih Pynor- Ka Thup ki Poitry” ka kynthup ha ka ia phra phew hynniew (87) tylli ki poitry ha la ki jong ki dur poitry ba thikna jongki. Don khambun tylli kiba ha ka dur lirik kiba pynshoh kyndeh shadem ia ki bor jingsngew jong u myllung, kumjuh ruh ki sonnet ha ka rukom Italian bad English. Don kiba ha ka dur ka ballad, elegy bad ka ode. Kawei na ki poim ba u la ai kyrteng “Ha ka Aiom Mihpat” ka long ha ka dur sataiar ne kyoh mynthi, ka ba dei ka sataiar jong ka sain pyrthei ha ka jylla jongngi. Ka poim “Bijai” ka pynmyllung bad ktik ïa ka jingsngew jongki nongpule shaphang u briew uba wad ia ka jingieit bad kumno ka jingim jong u ka kylla bijai namar ba u khlem ioh mad ia ka ba kum kata na la ka jong ka rympei. Don ruh ha kane ka thup ki poim ki ba dei ki translation ba la pynkylla sha ka Khasi na ki poim jong ki myllung nongwei na shilliang duriaw ia ki ba i Sr.Philomena Kharakor, Principal barim ka St.Mary’s college, Shillong i la kynthoh kumne ” Ha ka jingtbit jong u myllung ban phrung la ka khlieh sha ka hara jongka translation, ka rynieng jong u kam duna, u tam wat ia ki nongpynkylla Khasi ba pawnam ba mynshuwa”. U nongthoh u ngeit ba kum u myllung u dei u nongpeit uba buh jingkylli bad lyngba kane ka thup poitry jong u, u buh jingkylli ia ki sainpyrkhat, ia ka longbynriew, ka longpyrthei bad longmariang hi bad dei ki jingkylli kiba long ki nongpynor ia kaei kaei kaba bun ki tharai ba ka la neh la skhem ne la biang, la sngew dei bad kumta ter ter da ka jingthmu ym ban pynpait ia ka jingor hynrei ban ioh maramot pynbha ia ka watla don ruh ki jingor ki ban ïalam beit sha ka jingpait jingpra bad hap ban pdiang ïa ki kumta. Kumno ngin pdiang bad aiu ngin leh, ka sah hangi ki nongpule.
Ïa kane ka kot “Khmih Pynor- Ka Thup ki Poitry Khasi” lah ban ioh na ka Ri Khasi Book Agency, Mawkhar ha ka dor T.150 bad T.200/- kawei.
