Shillong, Jylliew 20 : Ka jingïap jong ki briew na ka jingtwa khyndew bad ka jingshlei um naduh ka 01tarik u Ïaiong tad haduh ka janmiet 20tarik mynta u bnai ka la kynjoh sha ka 34 ngut.
Katkum ka jingai jingkheiñ da ka sorkar jylla, la kdew ruh ba ki don haduh 11 ngut ki briew kiba dang jah bad haduh 22 ngut kiba dang don mynta ha ka jingshah sumar.
Lah ban kdew hangne ba ha ka jingai jingkheiñ kaba la phah da ka sorkar jylla hynin ka sngi, ka jingdon ki briew kiba khlad ka long 28 ngut bad kiba jah pat ki long 8ngut.
Hynrei ha kane ka sngi Nyngkong pat ka jingkheiñ ba ki phah ka long ba kiba khlad na katei ka jingwan lyngshop ki bor marïang ka la kot sha ka 34 ngut. La kdew ruh ba ym shym la don shuh ba ïap ha kine ki 24kynta.
Nalorkata, la kdew ruh ba naduh u Ïaiong haduh mynta ki don haduh 924 tylli ki shnong kiba shah ktah, bad kumba 6,33,929 ngut ki nongshong shnong kiba kylla long ki lanot ha katei ka jingjia. Shuh shuh la ong ba ki iing kiba shah ktah ki la don haduh 4,373 tylli bad na kine, ki la don haduh 263 tylli kiba la julor jur bad 95 tylli kiba la pra phom.
