La pynlong ia ka ‘Credit Camp’ bad jingthep kyrteng ha ki insurance bapher bapher ha Mawpat Block

Shillong, Jylliew :ïa ka ‘Credit Camp’ ne ka prokram shim loan bad ka jingpynrung kyrteng ha ki Social Security Scheme, Aadhar, e-Shram na ka bynta ki Self Help Group (SHG) jong NRLM bad Producer Group (PG) la pynlong ha Mawpat block ha ka 17 tarik mynta u bnai hapoh St. Claret Hall, Mawpat.
ïa kane ka prokram la pynlong da ka ka Block Mission Management Unit (BMMU) Mawpat ba la pynïaid da ka Bosco Integrated Development Society(BIDS), ryngkat lang ka ophis treikam ka BDO, Mawpat C&RD Block bad ka FOCUS jong ka Block Development Unit(BDU), East Khasi Hills.
Ha kane ka program la ïa don ryngkat ki kynrem ki lyndan ki ba kynthup ïa I Bah A.L Hek, MLA Pynthor-umkhrah, Bah D. Hynniewta-Project Director DRDA, Bah R. Kynta – COO MSRLS, Kong M.S Kshir-BDO Mawpat C&RD Block, Fr. G. Wanniang – Director BIDS, Ki Branch Manager – MRB (Rynjah, Nongmensong bad Mawpat), ki nongmihkhmat na ka District Mission Management Unit- MSRLS, ka SIDMUI (Urban Affairs), B.M ka NESFB, BPM, Mawpat bad ka team bad ki nongtrei ka Block.
Ha katei ka sngi la ïoh ban pyllait ïa ki Cheque na ka bynta 10 tylli ki SHG bad 27 tylli ki PG bad ban thep ïa ki aplikeshon jong ki 21 tylli ki SHG ka NRLM na ka bynta ka Loan ban sengkam sengjam bad ban pynrung kyrteng pynleh ïa ki insurance bapher bapher jong ka sorkar (PMJJBY, PMSBY, APY) na ka bynta jong 157 ngut ki dkhot jong ki SHG. Nalor kata la ïoh ruh ban sam ïa ki khusnam sha ki 2 tylli ki SHG kiba trei kam bha, ka Lotus SHG bad ka Tyngshain SHG(PWD).
U Bah AL Hek haba ai jingkren ula kyntu ïa ki SHG ba kin shim ïa ka lad ha kaban sengkam sengjam ban kyntiew ïa ka ïoh ka kot jong ka longïing bad ula ban ruh ban ym kynrandien hynrei ban jop ïa kita ki jingeh da ka ba wad lad da ki rukom bapher kum ki training, peit nuksa, wad jingtip bad lada sdang ïa kano kano ka kam ki dei ban don ka jingthmu ban poi sha ka thong.
Ha kane ka sngi na ka liang u MLA u la kular shi lak tyngka sha ka ophis jong ka BDO ban bynta sha ki SHG ki ba la treikam bha. Kiwei ki ba la kren ha kane ka sngi ki la ai ïa ka jingkyntu kynpham ïa ki SHG bad PG ba kin pyntreikam ïa ka pisa loan da kaba seng kam sengjam bad ban kyntiew ïa ka jingïoh jong ki bad ban pyni nuksa de ïa kiwei ruh ban pynïasoh ha ka group.
Shuh shuh ha kane ka sngi la don ruh ka jingpyni bad die ïa ki mar jong ki SHG ha kaba 12 tylli ki SHG ki la shim bynta bad wanrah ïa la ki kam ki jam ba ki trei bad ha bakut ka sngi ki SHG ki la kmen ba ki la ïoh ban die ïa ki tiar bad ki mar.