Mawkyrwat, Jymmang, 22: Ka Shnong Phot-eit-sim kaba hap hapoh ka Ranikor Civil Sub Division, South West Khasi Hills District ka la buh da ka jingmaham tyngeh da kaba ong, “ba lada lap ïa kino kino kiba ber dawai bih, pynhap jar bad ther bom ha wah Photmula ka kuna kaba heh ka la ap lypa kaba kot haduh 50 hajar tyngka”.
Kane ka jingmaham jong ka shnong Phot-eit-sim ka mih hadien ba ka jingpynjot ia ki doh um doh wah ha kine ki por ka la long kaba shyrkhei haduh katta katta namar kiba bun ki riew shim kabu ki leh ia kine ki kam ban ber dawai bih, siat bom bad ban pynhap jar ha ki wah tang ban pynhun ia ka jingkwah jong ki bad da kaba kim pyrkhat pat ia ka jingjot jong ki jingthaw ba im hapoh um.
Ka shnong Phot-eit-sim, South West Khasi Hills District ka dei kawei na ki shnong kaba don ha khap border kaba marjan bad ka shnong Photkroh bad ha kane ka shnong ka don kawei ka wah kaba la tip kum ka Photmula. Ha kaba ïa dei bad ki jingpynneh pynsah ïa ki jingthaw ba im, na ka liang ka shnong Phot-eit-sim ka ïaleh katba lah ban thaw ki lad ki lynti ban pynneh pynsah ïa ki doh-um ha kane ka wah Photmula bad ka la ju buh ruh ki jingmaham ba kam shah ban leh dusmon ïa kane ka wah ne ban nongpynjot, hynrei ki ‘riew shim kabu tang shu mih ka tlang ki juh hiar sha ki wah ban leh dusmon.
“Ki nongleh dusmon ki lah ban kynthup ïa ki khasi bad ki garo kiba shong mar jan bad katei ka wah Photmula bad kim ju burom ïa ki adong jong ka shnong Phot-eit-sim”, ïathuh u bah u bah Angeljune Snaitang uba dei u Myntri Shnong Phot-eit-sim. Kumta kum u Myntri jong ka shnong photeitsim u la ong kumba ka long mynta kane ka wah ka don ki kshaid, ki thwei kiba itynnad kaba lah ban khring ïa nongwan jngohkai pyrthei lyngba ka jingitynnad jong kane ka wah bad lada lah lei lei sa ban pynneh pynsah ïa ki doh-um doh-wah kata kan nang pynïapmat ïa ki khmat jong ki nongwan jngohkai.
