New Delhi, Jymmang 17 : Ka erïong pui pui kaba jur kaba bud lang hadien bad u lapbah ka la khyrwit tyngeh ïa ki bynta jong ka nongbah Dehlhi ha kane ka sngi Thohdieng nalor ba ka tnad ba pyntip ïa ka jinglong jingman ka mariang ki la maham ba ka jingbeh kyrthlep jong ka lyer ka lah ban nang jur shuh shuh ha ki kynta ban dang wan.
Ki la don bun bha ki jaka jong ka Delhi kynthup ïa ka Central, South, Southwest, Northzone bad ki bynta jong ka National Capital Region (NCR) ba kynthup ïa ka Noida ki la mad ia u lapbah ryngkat ka erïong nalor ka jingbeh ka lyer pui pui.
Na ka liang ka India Meteorological Department (IMD) ha ka jingpyllait ïa ka jingmaham namar ka jinglong jingman jong ka suinbneng, ka la ong ba kane ka jinglong ki bor ka mariang ryngkat ka jingbeh paswut ka lyer ryngkat u slap bad ka leilieh ki dang lah ban bteng ha kylleng ki bynta jong ka Delhi bad NCR ha ki khyndiat por ban wan.
Don ki bynta jong ka Delhi NCR kynthup ïa ka Noida kiba la mad lang ïa ka jingshah rat ki dieng ha ka jingsyllad ka erïong.
Hynrei ka jingshit kyrang jong ka sngi ha nongbah Delhi ka dang neh beit ha ki 40.8 degree kaba long 0.4 degree na kaba ju don. Katba ha kane ka sngi ka jingshit kaba duna eh ka long 24.3 degree kaba long 2.2 degree na kaba ju long barabor.
Na ka liang ka IMD ka la buh jingmaham lypa ruh ba kan don ka jingther lap ha kane ka sngi U Blei ryngkat ka jingkdew baka jingshit ka lah ban kot sha ka 42degree bad lada duna eh ruh kan poi beit sha ka 28 degree.
Ha kawei pat ka liang la ong ba ka jinglong jingman jong ka lyer ha Delhi ne kata ka Air Quality Index (AQI) ha kine ki 24 kynta kaba la kdew ha ka por 6:00 baje janmiet ka kdew ba ka kot 157 kaba mut ba ka jingkhuid jingjaboh ka lyer ka long pdeng.
Katkum ka AQI, naduh 0-50 la niew ba kadei ka lyer kaba khuid bha, nangta 51-100 kadei kaba dang paka bad 101-200 kaba dang shu biang, bad 201-300 pat kaba la jaboh bha bad 401 – 500 pat kadei kaba la jaboh shaba palat pud.
