Shillong, Jymmang 17: U Myntri Rangbah ka jylla u Conrad K. Sangma u la plie paidbah ïa ka ophis ba thymmai ka SIROBILT Software Services Pvt. Ltd., kaba dei ruh ka US-based technology solutions company, ha IT Park kaba don ha Mawdiangdiang, Shillong.
“Ka jingdon jong ka SIROBILT ha kane ka thaiñ ka long ka sienjam kaba kongsan na ka bynta ka local IT ecosystem jong ka jylla. Ka company ka la pyrkhat ruh ban thungkam haduh 300 ngut kiba la pyntbit ha ka kam software, ha kaba kane kan ai lad ïa ki samla ban ïoh ïa ki kam ki jam ha kaba ïadei bad ki kam technology,” bynrap u Myntri Rangbah.
La ong ba ka SIROBILT ka dei ka kompeni kaba san ban treikam ha kane ka jylla ha Shillong Tech Park. Ka jingbuh ïa kane ka ophis kaba thymmai ka long ka dak jong ka jingtreikam kaba pura ha ka Phase-I kaba don ha IT park.
U Myntri Rangbah u la ïathuh ruh ba na ka liang ka sorkar ka la pynlut khambun ha kaba ïadei bad ka kam IT naba kane kan ïarap ban kyntiew ïa ka ïoh ka kot bad khamtam eh ha ka jingai kam ïa ki samla ba bun jong ka jylla.
Ka jingpynïar ïa ka Shillong Tech Park (Phase – II) kan khring ïa kiba bun ki kompeni IT kiba bun ba kin lah ban seng ïa ki kam, khamtam kiba ïadei bad ki kam digital technoloy, kum ka AI, blockchain bad cloud computing.
U Myntri Rangbah u la pyntip ba ka sorkar kan ïai kyrshan ïa ki kompeni kiba kwah ban pynlut ha kaba ïadei bad ka IT sector.
