Yn ym don kiba kwah don bynta ha ki kam beaiñ khamtam halor ka kam tih dewïong, ong u Bah Kyrmen

Shillong, Jymmang 14: U Myntri ka sorkar jylla uba khmih ïa ka tnat Revenue and Disaster Management u Bah Kyrmen Shylla ha ka sngi Balang u la ong ba yn ym don mano mano ruh kiba kwah ban ïashim bynta ha ki kam beaiñ khamtam eh ha kaba ïadei bad ka jingtih ne khaiï ïa u dewïong.
Haba jubab lada ka jingsdang ïa ka scientific coal mining kan pynkut noh ïa ka kam tih bad khaiï dewïong beaiñ, u Bah Shylla u la ong, “Ha ka jingshisha ym don kiba kwah ban leh ïa ki kam beaiñ ha kano kano ka kam bad kim kwah ruh ban leh ïa kane ka kam naba kadei tang ka kam kaba kim lah ban pdiang.”
“Ha ka jingshisha nga sngew sarong ban ong ba hapoh ka sorkar MDA I & II, ngi ïoh ïa kane ka lad ban sakhi ïa ka jingsdang ïa ka jingtih dewïong katkum ka stad saïan bad kane kan long ka jingmyntoi kaba khraw ïa ki paidbah ka jylla,” u la ong.
Haba ong ba ki paidbah ki pdiang ïa ka kam tih dewïong katkum ka jingstad saïñ, u Bah Shylla u la ong ba kane kan ïarap ïa ki paidbah ban kamai ha la ki jong ki kam ba manla ka sngi.