772 tylli ki shnong, ïap 27 ki briew, 7 ki jingri jingdub, jah rngai 8 ngut

Shillong, Jylliew 18 : Kat kum ka kaiphod ba la phah da ka tnad Disaster Management Authority jongka sorkar jylla la ïathuh ba ki la don bun ki jingjia, jingjulor, ki jingiap ha ka jingshah lyngshop ha ki bor mariang naduh ka 1 tarik Iaiong 2022 haduh mynta ka sngi 18 tarik Jylliew 2022, ha kylleng ki district jongka jylla.
Ki District kiba shah ktah ki long naduh ka East Khasi Hills, West Khasi Hills, South West Khasi Hills, Ri Bhoi, East Garo Hills, West Garo Hills, South Garo Hills, South West Garo Hills, North Garo Hills, East Jaiñtia Hills bad West Jaiñtia Hills.
Ki shnong kiba la shah ktah jur ha ka jingshlei um bad jingtwa ki long 772 tylli, ki briew kiba la duh noh ïa ki jingim ki long 27 ngut, ki jingri kiba la iap ki long 7 tylli, ki briew kiba dang jah rngai ki long 8 ngut, kiba mynsaw ki long 20 ngut bad ki briew kiba shah ktah ki long haduh 5,85,999 ngut.
Nalor kane ki ïing kiba la shah pynjulor ki long 3981 tylli, na kine kiba la shah pynjulor phom ki long 258 tylli, kiba malu mala 3,437 tylli bad kiba julor jur pat 89 tylli. Ki briew kiba la ïoh ban pyllait im ki long 15 ngut.Ki ïing sherdara ne ki Reslief Camp kiba la pynkhreh ki long 26 tylli bad ki jaka rep jaka riang ba la shah pynjulor ki long 27 tylli.
Nalor kata bun tylli ki surok kiba la shah pynjulor jur namar ka jingtwa ba la jur palat u lapbah. Bun tylli ruh ki ïing skul kiba la shah pynjulor. Ha kine ki jingshlei um na ka liang ka sorkar pdieng ka la phah ïarap ruh ïa ki NDRF ba kynthup naduh ki shipai suiñ, shipai duriaw, shiphai ryngkew. Na ka liang ka sorkar jylla pat da ki SRDF ba kynthup ïa ki bor pulit, ki pulit pynlip ding bad ki lieng.
Hapoh kine ki 24 kynta pat jongka jingther u lapbah ha ka jylla, la ïoh ban sei hynnin ka miet ïa ka met jong u bah Robino Kynter uba shah rong ha ka jingtwa khyndew ha ka shnong Kenmynsaw, Mawsynram. Kumjuh ruh ïa ka met iap jong u nongbud trok uba la shah rong noh haka jingtwa ka surok ha Lumshnong bad thung khongpong ka trok ba u bud shapoh krem jongka surok.
Ka la jia ka jingshlei um ha Ranikor ha kaba 22 tylli ki ïing ki la shah ktah. Ka la jia biang ka jingtwa khyndew ha Saipung Block ha kaba 2 tylli ki ïing ki la shah ktah jur.
Tang hapoh kine ki 24 kynta ki la don 20 tylli ki shnong kiba shah ktah jur, 134 ngut ki briew kiba la mad ïa ki jingshah lyngshop ki bor mariang bad kiba khlad ki dei kitei ki arngut kiba la lap hynnin ka miet.
Ki ïing kiba la shah ktah hapdeng kine ki 24 kynta ki long 25 tylli, 24 kiba julor malu mala bad kawei kadei kaba la julor jur. Ki jaka rep jaka riang ba shah ktah ki long 15 tylli. Ki jingkieng ba la shah ktah bad shah pynpra phom ha ka umsaw ki long ka jingkieng ïaid kjat ha Sonatala bad ka jingkieng ïaid kali ha Suktia, East Khasi Hills. Ka surok ba la shna naka skhim MGNREGS 2021-22 ka la shah pynjulor na ka jingtwa ka khyndew ha Mawblei, Mawkyrwat, South West Khasi Hills.
Ha East Jaintia Hills ka kynroh jongka Umkiang PHC ka la khyllem bad julor jur.