Tura, Iaiong 28 : U lapbah ba jur ha ryngkat bad ka eriong ki la lyngshop ïa ka sor Tura bad kumjuh ruh ïa ki jaka ba marjan ha kaba u wei u dieng u la shah jynrat bad khyllem bad la pynjulor pat ïa ar tylli ki kali ha Upper Babupara, kaba don mar pyrshah bad ka Cenotaph site.
La ïathuh ba u lap bah ba jur u la sdang kumba ha ka por shi baje mynstep bad u ïai bteng haduh ka por 6 baje mynstep.
Halor ka jinglong jingman jong ka mariang kaba la jia ha kane ka sngi, ka tnat Indian Meteorological Department (IMD) Meghalaya ka la pynmih ïa ka jingmaham ban ther u lapbah ha kylleng ki district jong ka jylla.
Ka IMD, ka ïathuh ba kan don ka jinghap slap ha baroh ka Jylla Meghalaya, ha ki saw ne san sngi ban wan, ha ryngkat u pyrthat, bad ka lei lieh kumjuh ruh ka lyer kaba jur.
Ka tnad ka la maham ruh ïa ka jingkhynñiuh jumai kaba lah ban jia ha ka 29 tarik u Iaiong, kaba lah ban ktah shuh shuh ïa ka jingim kaba man ka sngi ha kylleng ka jylla.
Halor kane, ka IMD kala bthah ïa ki paidbah nong shong shnong ba kin long kiba husiar namar ba kan don ka jinglyngshop ka lyer kaba jur bad kumjuh ruh u pyrthat.
Na ka liang ki bor pynïaid District kila kyntu ïa ki paidbah ba kin long phikir bad husiar bha bad kumjuh ruh ban wad jingtip halor ka jinglong jingman jong ka suiñ bneng.
