Lada ngam paw kyrteng ruh kam leilei, hynrei nga kwah ba ka surok Nongpoh-Umden-Sonapur kan ïong: MB Syiem

Nongpoh, Ïaïong 27: Hadien ka jingurlong jong ka surok kaba ki paidbah jong phew tylli ki shnong ka thaiñ Umden ki la ap khmih lynti kaba dei na Nongpoh-Umden ka ban mih shaduh Sonapur haka jing jngai kumba 58.5 km, ki la mih ruh bun kiba kamroh, hadien baka kam mynta ka la ïaid shaid shaid ban tih pynheh shuwa ïa ki jaka ba kham khapngiah shuwa ban siang rong.
Haba ioh ban ïakren bad u MLA ka Nongpoh u Bah Mayral Born Syiem u la ong ba kane ka dei ka mat kaba la slem ba ki paidbah ki la angnud bad naduh u snem 2022 kum u MLA ngala ïakhun ban buh ïa ki jingthoh sha ka sorkar ba katei ka surok ka dei ban urlong noh, hynrei ka jingsngewnguh ka leit sha ka sorkar kaba la sngap lem ïa ka ud ka nam bad ka jingeh jong ki paidbah hadien ba ka sorkar ka la mang pisa kumba 49.53 klur tyngka lyngba ka state scheme na Nongpoh sha Umden, katba na Umden sha Sonapur pat ba don kumba 38.6 kilometre la mang pisa kumba 47.20 klur tyngka lyngba ka PMGSY.
U la ong ruh ba kum u MLA ka thaiñ u la don naduh ba sdang ban ïakhun ïa katei ka surok namar ka kamram jong u ka long ban wanrah ki kam pynroi khamtam ban ioh noh ka mang tyngka na ka bynta katei ka surok kaba ki paidbah ki la shem jingeh shaba palat, bad ka jingurlong katei ka surok ka long shisha ka jingkyrkhu kaba khraw ïa ki paidbah watla ki don shibun kiba sdang ban kamroh.
“Lada ngam paw kyrteng ruh kam lei lei, hynrei ka jingangnud jong nga ka long ba ka surok Nongpoh-Umden-Sonapur kan iong, ban pynsuk ïa ki nongleit nongwan, kiba pang ba shitom, kiba beh sha ki jaka pule bad kumta ter ter, ngam sngew eiei ïa kiba kwah ban kamroh, haka por ba trei shitom dei kiwei, haka sngi ot ribbon dei kiwei, hynrei ka kam jong nga ka long ban pynthikna ba ki kam kin ïaid shaid shaid bad nga la ioh ruh ban ïakren bad u kontraktor ba pyntrei ïa katei ka kam bad la ioh ruh ban bthah ïa u ban pyndep kloi katba lah ïa ka kam u ba la kular ruh ban ïaleh ban pyndep hapoh shisnem” la ong u Bah Mayral da kaba bynrap ruh ba kam dei ka kamram jong nga ban kamroh, ki nongshim kabu kin don shibun, ngi kiba la jwat ka snieh ngim sngew eiei shuh hynrei ai ba ki paidbah kin bishar mano ba dei hok ban ioh ka jingïaroh.
U la ong ruh ba kam mynta ka la ïaid shaid shaid, ha kaba ki don ki jaka ba khim kiba hap ban tih pynheh hynrei u la kyrpad sha ki paidbah bad ki riew shimet ban ai ka jingïatreilang haba pyntrei ïa kane ka surok namar ka lah ban don ka jingshim jaka bad ngat ruh ki diengsoh dieng pai, namar ka jingdonkam ban pynheh bad pyniar na ka bynta ka jingsuk jong ki paidbah bad hakajuh ka por kum ki paidbah ki dei ban long kiba ïaishah namar ngi sngewthuh ba ki kali ba leit ba wan ki mad bun ki jingeh khamtam ka jingktieh haka por slap bad pum pum haka por ba rang ka bneng, hynrei la sakhi baka jingpyntrei ka long kaba hun.
La ioh ruh ban ïakren bad katto katne ki riew khmat ba kynthup ïa u Bah M Syiem Chairman ka Synjuk ki Rangbah Shnong, Raid Nongtluh bad katto katne ki paidbah ki la pynpaw ka jingsngewkmen kaba khraw ba ka jingphoh sniew jong ki paidbah baroh shi katta ka la sdang ban urlong kumba ki kam mynta ki la sdang ban ïaid shaid shaid watla ki paidbah ki hap ban mad jingeh hynrei na ka bynta ka jingsuk ki hap ban ïaishah shipor kumba ki paidbah mynta da ki bun bun snem ki la mad jingeh namar ka jingjot rathai jong u surok.
Kum ki nongïalam shnong bad ki paidbah ki la ai ruh ka jingïaroh bad jingkhublei ïa ka sorkar hapoh ka jingïalam u Conrad Sangma, Bah Prestone Tynsong bad kumjuh ruh ïa ki nongmihkhmat ka Nongpoh Constituency kiba la shimkhia ban buddien ïa katei ka kam ban pynsngew sha ka sorkar tad haduh ba ka kam mynta ka la urlong bad khmih lynti ba shen ki paidbah kin sa ioh ban ïaid halor ka surok rong.