Ïashimbynta 14, 503 hajar ngut ki kyrtong ha ka eksam MTET ba pynlong ka tnat Pule Puthi

Shillong, Iaiong 26: Ka Directorate of Educational Research and Training (DERT), Shillong kaba hab hapoh ka tnat Pule puthi ka la lah ban pynlong ïa ka Meghalaya Teacher Eligibility Test (MTET) kaba la long ha ka sngi Thohdieng na ka bynta baroh artylli ki Lower Primary bad Upper Primary level.
Ïa kane ka eksam la pynlong ha ki 38 tylli ki jaka ha kylleng jong baroh ki 12 tylli ki District jong ka Meghalaya.
Ha kane ka eksam ki la don baroh 14,503 hajar ngut ki candidate kiba la aplai na ka bynta ka eksam MTET na ka bynta ka Lower Primary level bad kumba 12,813 hajar ngut ki candidate kiba aplai na ka bynta ka Upper Primary level.
Ka jingpynlong ïa ka eksam MTET ka dei ka sienjam kaba kongsan ban pynthikna ïa ka pule puthi kaba bha ha ka jylla bad kane ka jingwan shim bynta kiba bun kiba ïakhun ïa kane ka eksam ka pynpaw ïa ka jingangnud bad ka jingaiti jong ki halor ka jingkwah ba kin long ki nonghikai kiba dang pynkhreh.
Ban pyndep ïa ka MTET ka dei kawei na ki qualification ba kongsan kaba long katkum ki kyndon jong ka National Council for Teacher Education (NCTE) na ka bynta ban thung kam ïa ki nonghikai ha ki Lower bad Upper Primary level ha Meghalaya.
Ka Directorate of Educational Research and Training (DERT) ka la ong ba ka la lah ban pynlong ïa kane ka eksam da kaba khuid bad kaba shai, bad ïa ki result yn sa pynbna ha ki sngi ban wan. Ka tnat Pule puthi ka la pynpaw ïa ka jingsngewhun halor kane ka jingïaid beit ïaid ryntih jong ka jingpynlong ïa ka eksam MTET, 2025 bad ka la ai jingïaroh ïa ka jingïatreilang jong baroh kiba ïashim bynta.