Riangdo, Jylliew 18: Hadien ba ka District Council lyngba ka 15th Finance Commission 2020-21 ka la mang tyngka kumba 2 klur ban shna ïa ka Super Market ha Riangdo, mynta pat ki paidbah jong ka thaiñ ki la sakhi ba ka jingpyntrei ïa katei ka ïew ka la ïaid shakhmat bad bun ruh ki la khmih lynti ba hapoh ar snem yn lah ban pyndep noh.
Ha ka jingïakren bad ki nongthoh khubor, u Bah Spingshon Mawlieh, Finance Secretary ka Lyngngam Nongtrai Multipurpose Co-operative Society, u la ong ba kane ka scheme ka wan na ka KHADC lyngba u MDC ka thaiñ u Bah Gigur Myrthong bad la tei ïa katei ka ïew ha ka jaka jong ka Society kaba don ha syndah ka ïew Riangdo.
U la ong ba jingïoh ïa katei ka scheme lyngba ka District Council kan sa long ka jingkyrkhu ba khraw ïa ki paidbah, ba kin ïoh ban ïa die ïa thied ïa ki mar ki mata ha katei ka jaka bad kumjuh ban wanrah ïa ka jingkylluid ïa ka ïew Riangdo da kaba pynlong ruh ïa ka jaka ïeng kali ha katei ka jaka.
Na ka liang utei u rangbah u la ai khublei ïa ka KHADC khamtam ïa u MDC ka thaiñ, u ba la lah ban pynurlong ban pynïoh ïa katei ka scheme. U la pynpaw ruh ba kane ka dei ka sien ba nyngkong bad kan long ka jingkyrkhu ïa ki paidbah namar ka jingïoh ïa ka Super Market hapoh ka Mawshynrut Civil-Sub Division. U la kyntu ïa ki paidbah bad ïa baroh ki dkhot jong ka society ba kin ai ka jingïatreilang ban nang kyntiew ïa ki kam pynroi ha ka dong ka thaiñ.
