Nongstoiñ: Ka FKJGP West Khasi Hills District ha ka sngi balang, ka la ïoh ban pynthymmai ïa ki nongkitkam jong ka FKJGP Nongstoiñ Circle, ha ka jingïalang kaba la long ha Circuit House DRDA Nongstoiñ.
Ha kane ka sngi lah ïadonlang ruh u General Secretary FKJGP central body bah Eldie N.Lyngdoh, bah W.Lyngdoh Organising Secretary FKJGP central body, bah Chandra Nongdkhar President FKJGP West Khasi Hills District, bah Willis Syiem General Secretary FKJGP West Khasi Hills District ryngkat ki nongïalam jong ki Circle bapher bapher.
Ïa kane ka jingïalang la pynïaid da u bah Cary Kharmutee Vice President FKJGP West Khasi Hills District bad la ïoh ïa ki jingkren ruh na ki nongïalam jong ka FKJGP bah Eldie Lyngdoh, Chandra Nongdkhar, bah W Lyngdoh bad kiwei kiwei.
La ïoh ban pynskhem ïa kine ki nongïalam ka Nongstoiñ Circle da u bah Eldie Lyngdoh, u ba hadien ba la pynskhem u la ong, “Kum ki dkhot ngi dei ban kynmaw ba ka FKJGP kan ym kular ïa phi ka jingsuk, hynrei ki jingïaleh kaba tyngeh haba ka ri bad ka jaidbynriew ka dawa wat lada dei ban ïaleh. Ka jingdon jong ngi ha ka seng kam dei ba ngin sngew heh ne leh ba heh hynrei ban shakri”.
“Ka por ka la dawa ba ngin ieng ban ïaleh ïa ki jingeh bad ruh ba ngin ym long kum kiwei pat ki jylla, ha kaba la synshar da ki nongwei bad ki trai shnong hap ban mih da ki tymmen ki kro. Ka por ka lah dawa ba ngin ieng shynrang ban ïada ïa ka ri bad ka jaidbynriew ïoh kan jia kum ha ki snem ba lah leit, ha kaba ki mynsiem ba lui lui ki khun u Hynñiewtrep ki shu duh ei ïa la ka jingim”, u la ong.
Ki nongïalam ka FKJGP Nongstoiñ Circle kiba la dep pynskhem ki long Pynshai Kharbani President, Anandstar Peiñlang Vice President, Nicky Marweiñ Secretary, Kyntiewbor Syiem Assistant Secretary, Brostar Jyrwa Chief Organiser bad kiwei kiwei de.
