Nongstoiñ: Ka Seng Khasi Student Union Mawshynrut Circle, mynta ka sngi ka la ioh ban pynthymmai ïa ki nongkitkam na ka bynta ka samoi treikam jong u snem 2022-2025.
Ïa katei ka jingialang la ioh ban pynlong hapoh Christ King Hall Banglapluh Riangdo, ha kaba la wan ban shim bynta da baroh ki Unit jong ka Seng na kylleng ka Circle, ha ryngkat ka jingiadonlang ki dkhot ka KSU WKHD, KSU Seng kmie, ki riew rangbah jong ka thaiñ bad kiwei kiwei.
Ki don haduh 5 tylli ki post ba hap ban ïakhun da kaba thep vote, katba kiwei pat ki long kumjuh namar ka jingbymdon ba ïakhun, ki nongkitkam kiba la shah jied thymmai ki kynthup ïa u bah Armstrong Sohshang President, Kitbor Riangtem Vice President, Ulysis Ryntong General Secretary bad kiwei kiwei.
Ïa kitei ki nongkitkam ba thymmai jong ka Seng lem bad ïa ki dkhot ka Girls Wing la ioh ban pynskhem bad pyntian smai da u President ba rangbah duh jong ka Seng Sengkmie u Samla Lambokstarwell Marngar.
Une u nongialam ka KSU u la kyntu ia kine ki samla kiba la pyniasoh kum ki dkhot jong ka KSU ba kin trei shitrem na ka bynta ki dawbah jong ka jaidbynriew ym ban rung dkhot hapoh ka seng na ka bynta ban shim kabu ban pynmyntoi ialade shimet.
