Da ki bun snem u Slasha Jyrngam lane Green Tea u la ïoh ïa ka nam uba bhatam namar kita ki jingmyntoi ba phylla na ka bynta ka koit ka khiah, kata ka jingdon bun ka Antioxidant. U long uba khraw na ka bynta ka jingkhiah u klongsnam bad pynkhlaiñ ruh ïa ka jabieng.
Hynrei, kaei pat kaba la lap bad shem ba ka jingmyntoi ka koit ka khiah na ki jait slasha, la shem ba u slasha puipui (powder) ‘Matcha’ ba la shna na ki sla ba danglung jongu slasha jyr-ngam ne green tea u kha da phewshah ban ïa u slasha jyrngam. Ïa kine ki sla la buh ha ka jaka ba tngen ne ba lait na ka jingthang ka sngi haduh ar lane saw taiew ha shuwa ban tylliat hadien ba la dep kheit.
“Lada la buh ha ka jaka ba ïada na ka sngi, ka kyntiew shuh shuh ka jingbun ka Chlorophyll, ka kyntiew ïa ka jingbun ka antioxidant”, ka Dr. Mariza Snyder, kaba long ka nongthoh jong ka “The Matcha Miracle” ka la ong, “Hadien ba la kheit ïa kine ki sla, la syang ha ka jynjaw bakhluid, thad pyntyrkhong, nangta sa tylliat pynkylla phngit pui-pui lane pawder. Une u Matcha u don haduh shiphew shah ka jingbun ka antioxidant ban ïa u slasha jyrngam, ka la ong.
Ka sha ba la shna na u matcha ka don ïa ka jingmad kaba ïasyriem bad u green tea. “U don shisha kata ka jingmad kaba phylla kaba long syriem kum u jhur jyrngam, bad ka long dawai bha”, la ong ka Snyder.
U Matcha u mih tynrai na Japan, ha kaba tang kita ki riew khraw ne riew donburom, kum ki Monk ne Lyngdoh niam Buddhist, bad ki Samurai ki judih bha ïa une u Matcha. Ki Samurai ne kita ki khla talain wait ba tbit bad ba shlur ki lah ban dih ïa u ha shuwa ka thma na ka bynta ban ïoh ïa kata ka bor kaba neh da ki kynta-u lah ban ai bor saw haduh hynriew kynta bad bym don jingtlot eiei, kumba long u coffee.
Ki antioxidant ba don ha u matcha ki long 14 shah ban ïa ki antioxidant ha ki sohkhlaw blueberry- ki long kiba myntoi namar ka EGCG jong ka antioxidant ba don ha u Matcha lah ban kyntiew ïa ka koit ka khiah u klongsnam, pynduna ïa ka cholesterol, khanglad ne ïada na ka cancer bad ka jingpang shini type 2 diabetes, bad kyntiew ne pynkhlaiñ ruh ïa ka bor pyrkhat.
U Matcha u don ruh ïa ka L-Theanine, kaba long ka amino acid kaba lah ban kyntiew ne pynkhlaiñ ïa ka jabieng. Tang shi pela u matcha ha ka shi sngi ka long kaba donkam ïa phi, la ong ka Snyder.
Ka rukom shet ne pynkhreh ba kham long tynrai bha ha kaba pynkhreh ïa une u matcha ka long ban khleh ïa u bad ka um kaba la khluit tangba ka bym pat thnam na ka bynta ban pynneh ïa ki antioxidants. Hadien kata kingbha ha kata ka rukom pynkhih ba ïaid ha u dak jong u ‘M’ bad ‘W’, ong ka Jessica Lloyd, kaba la lap lang ïa une u jingdih bad ka COO jong ka Panatea, ka kompany matcha ba don hapoh US.
Une u matcha u wan ha ki rukom bapher bapher; u long ruh uba lah ban pyndonkam ha ki por leh sngewbha bad lah ban khleh lang ïa u bad ka dud, kaba khluit lane kaba pjah. Uta u matcha Culinary u long uba kham khlaiñ bad lah ban khleh lang ruh ha ki jingbam ba shet ne syang ha ki jaka shet jingbam bad ki jingdih.
“Ngi pyrshang ban pyndonkam ïa u matcha ha kiba bun ki jingbam bad ki jingdih bapher bapher hangne”, ong ka Michelle Gardner, kaba long ka trai jong ka Chalait Cafe hapoh New York City. “Ngi kwah ban pyni ba lah ban pyndonkam ha ki jingdih jingbam bapher bapher bad ha ki jaka ia bam bapher bapher”. U salsha pawdar ki kynthup ïa kata ka matcha Greek yogurt, matcha latte bad kita ki jhur ba la pynkhreh ba khleh lang ha u matcha.
Une u matcha u long uba kham remdor ban ïa u green tea ba ju pyndonkam salonsar. Ban tylliat ïa u Matca donkam kumba kynta na ka bynta ban shna shi tin u matcha bad u don bun ba ka chlorophyll. Ka jingdih ïa une u matcha ka kyntiew ïa ka koit ka khiah jong ka baroh. Ka jingba ka sniehdoh, ka bor kynmaw bad bor pyrkhat, ka nehslem ka jingkhlaiñ bor.
