Shillong, ïaïong, 22: Ki bor pynïaid jong ka District Child Protection Unit jong ka Mandya District, Karnataka kin sa wan poi ha nongbah Shillong ha ka sngi Ba lang ban aiti ïa ki 22 ngut ki khynnah rit na ka jylla Meghalaya ïa kiba la ïalam sha ka jylla Karnataka hadien ka jingjia ba sngewsih.
Ïa ki 22 ngut ki khynnah rit yn sa shimti da ka Directorate jong ka ophis Social Welfare ha nongbah Shillong.
Baroh ki khynnah rit kiba pule ha Gokul Educational Institution, Mandya District, Karnataka, ki la kem pang bad la pynkit noh mardor sha hospital hadien ba ki la bam ïa ka jingbam ba la sah ha ka jinglehniam Holi. Arngut na ki khynnah rit na kane ka jylla Meghalaya ki la duhei ïa la ka jong ka jingim hadien ba ki ladep bam, katba 22 ngut kiwei pat ki la kem pang.
Katkum ka jingpyntip na ka Sorkar, ki 22 ngut ki khynnah rit kin sa poi ha Guwahati ha ka por 10:30 baje mynstep bad la khmihlynti ban poi sha nongbah Shillong shwa ka por 2:30 baje noh phai sngi ïa kiba yn sa aiti pat sha ki bahaïing hasem.
Kum ban shu pyntip hangne, ki arngut ki khynnah rit ba la duhei ïa ka jingim ha katei ka jingjia ki long u heprit Namebantei Marweiñ na ka shnong Sohparu, West Khasi Hills District bad u heprit Khrehlang Khongtani na ka shnong Lyndem, Pynursla, East Khasi Hills District.
Ïa kitei ki khynnah na Meghalaya la ïalam da ka Leisynshar Cultural Society, Meghalaya ban phah pule ha Gokul Educational Institution kaba don hapoh ka shnong T. Kagepura, Mandya District, Karnataka.
