Nongstoiñ, Ïaïong, 22: Ka surok na Sohpian shaduh Nongstoiñ kaba jngai tang kumba 7 kilomitar ka dei ka surok kaba donkam haduh katta katta bad lyngba katei ka surok da ki hajar tylli ki kali rit bad kali heh ki ïaid man la ka sngi, hynrei katei ka surok ka shu kham heh khyndiat ïa ka lynti ïaid kjat bad lada kheiñ kat kum ka jingïaid ka por ka dang dei tang ka Jeepable road, kaba mut ba ki kali ba kham heh ki ba dei ban ïaid na katei ka surok ki dei ban long tang ki jeep.
Namar ka jingrit palat jong katei ka surok la jan ma la ka taïew ki jingïatyngkhuh kali ki jia hynrei ym ju kham don ki jingjia ba sngewsih namar ki nongñiah kali ruh ki kham phikir.
Ha kane ka sngi hatmajai ruh ka jingïatyngkhuh kali ka la jia biang ha katei ka surok hajan ka farm jong ka tnad ri dohkha hajan ka surok ban kiew sha ka shnong Mawrokporsohsat. Ki kali kiba ïatyngkhuh ki dei ka Maruti Alto kaba don ïa u registration No.ML.05Q 4452 kaba mih na Nongstoiñ ban kiew sha Shillon,. katba ka trok kaba don ïa u registration No ML 05.N 0712 kaba mih na ki thaiñ Mairang kaba thmu ban leit kit mawria na ka jaka tyllait maw kaba don ha Porsohsat.
Ha katei ka jingïatyngkhuh ka maruti ka la julor na ki bynta ba sha khmat katba ka trok pat kam shym lei lei, namar u nongñiah jong katei ka maruti u la kum leit tyngkhuh ha ka taïar ba shadien jong ka trok bad kaba donbok ka long ba ha katei ka jingjia ym shym don mano mano ba mynsaw.
Ha katei ka jingjia ki pulit pynïaid kali na Nongstoiñ ki la wan poi ha katei ka jaka ryngkat bad ki trai jong kitei ki ar tylli bad hadien ba ki pulit ki la dep ban sorjamin kitei ki trai jong kitei ki kali ki la ïakren bad ki la ïapynbeit halor katei ka jingjia.
Ha kaba ïadei bad ka jingïatyngkhuh kali khah khah ha katei ka surok, bun ki paitbah ki ju kynnoh ba ki nongñiah kali ki pynher sted palat. Kata ruh ka dei kawei ka daw, hynrei ka jingkynnoh ba baroh ki pynher kali ha katei ka surok ka long ka bym don nongrim satia haei haei ruh. Namar ym baroh ki nongñiah kali ki pynher sted kat haduh ban da poi ha u pud ban ïatyngkhuh para kali.
Ym lah ban len ïa ka jingshisha ba ki don katto katne ki nongñiah kali kiba pynher sted bha, hynrei wat la ki pynher sted ruh ki sngewthuh haduh katno ki lah ban the lakam ïa u stering ban lait na ka jingïatyngkhuh bad kiwei pat ki kali.
Haba phai ha ka jingrit jong katei ka surok ngim lah ban len ïa ka jingshisha ba kane ka dei ka jingñiew beiñ jong ka sorkar ïa ki paitbah nongleit nong wan jong ka West Khasi Hills, namar ha ki snem ba la dep ka la don ka jingong ba ka sorkar ka don jingthmu ban pynheh noh ïa katei ka surok pynban ynda la pyntrei ka surok ka la kham rit ban ïa kaba la don mynshuwa.
Ha kaba ïadei bad katei ka surok na ka liang ki riew rangbah ki la kynthoh jur ïa ka sorkar, da kaba ong ba imat kat bym pat ïap briew ha ki jingïatyngkhuh kali ka sorkar kam patiaw te hato kan myntoi aïu keiñ ba ka sorkar kan peitmat tad ynda la dep jia ki jingjia ba sngewsih.
Ha kajuh ka por ki la ong ba lada ka sorkar ka kwah ïa ka jingbha, ka dei ban pynheh noh kloi ïa katei ka surok hynrei lada ka kwah ba ki paitbah kin ïap, ki paitbah ki hap ban pyrkhat bun sien kumno kin leh.
