Pynmih kyndon jingmana ka Dorbar Shnong Khimusniang hapoh u pud u sam

Jowai, Ïaïong 21: Ka Dorbar Shnong Khimusniang, (DSK) Jowai ka buh ka jingpynkynmaw bad pyntip paitbah kino kino kiba ba don jaka ne ïing hapoh pud u sam jong ka shnong, kiba kwah ban Register ne leh Land Holding ïa ki jaka ki puta ki jong ki, ki dei ban ïoh shuwa ïa ka NOC naka Dorbar Shnong Khimusniang.
Kino kino kiba don jingthmu ban pyntrei ïa kino kino ki jait kam, kum kaba shna ïing, shna fencing, khlong khyndew da ka JCB, noh khyndew bad kiwei kiwei ki jait jingtrei kiba hap hapoh u pud u sam jong ka Shnong ki dei ban pyntip shwa sha ka ophis jong ka dorbar shnong bad ki dei ban ïoh ruh ïa ka NOC ha shwa ban trei ne leh ïa kano kano ka jait kam.
Ha kaba ïa dei bad ki nongthied jaka ne die jaka kiba hap ha hapoh u pud u sam jong ka shnong ki dei ban ai jingtip shwa sha ka Dorbar Shnong bad ïa ka Dostabit ïa die ïa thied dei ban thoh da ka Shnong.
Kino kino kiba pynkheiñ ne kiba leh pyrshah ïa kitei ki kyndon ba la ong haneng la ki dei ki nongshongshnong ne kiba nabar shnong. Ka Dorbar Shnong ka lah ban pynduh ïa ki jingdonkam jong ki bad ban thoh ruh sha ki bor jong ka aiñ.
Ka Dorbar Shnong Khimusniang, Jowai ka lah ban pynkylla ïa ki kyndon aiñ na ka por sha ka por kat kum ki jingdonkam.
Ban wan rah ïa ka shong suk shong shngaiñ hapoh ka Dorbar Shnong kala buh ïa ki kyndon jingmaham kiba long kumne, Ym bit ban ïa shong dih kiad, dih drok, dih kynja bad kiwei kiwei de ki jingdih pynbuaid hapoh kali lane ban ïa shongkai hapoh kali, ha ki jaka ba dum kiba hap hapoh u pud jong ka Shnong.
Ym bit ban ïa khalai/ïa shoh/ïa dat ne kren ïa ki ktien sih ktien sang hapoh u pud ka shnong.
Ym bit ïa ki kali/Motor bike ban ñiah ïa ka speed kaba palat ïa ka 30 Km/Hr hapoh u pud u sam jong ka Shnong.
Ym bit ïa ki kali ban pynheh ïa ki sur jingtem ne pyndait da ki muffler ha ki silencer ha ki kali ne ki bike/Scooty.
Ym bit ïa kino kino ki kali/bike/Scooty ba kin ïaid neutral da kaba pynlip ïa ki light haka por miet.
Ym bit ban bret ñiut kat sha ba lap hapoh u pud ka shnong.
Kino kino kiba pynkheiñ ïa kitei ki kyndon haneng la ki dei ki nongshongshnong ne kiba na bar shnong kin hap ban siew ïa ka kuna 5000/- bad ban aiti sha ka aiñ.
Ym bit ïa kino kino ki kali /bike/Scooty ban pynïeng ha ki jaka ba la thoh No Parking ha baroh arliang surok, dei ban buh tang ha ka jaka ba la thoh (One Side Parking Only). Yn shah ban pynïeng kali /bike/Scooty tang shipor ha ka por leit thied tiar dukan/dih sha dukan bad ha ka sngi Sunday por ba long Jingïaseng dei ban buh tang ha ki jaka ba kylluid surok ka bym pynwit (Block) ïa ka surok bad lada lap ïa kino kino kiba pynkheiñ aiñ yn pyndait khnap rynkat bad ki kyndon aiñ jong ka shnong da kaba kin siew ruh ïa ka fine 500/- bad ban ai ruh sha ki bor jong ka aiñ.
Ka Dorbar shnong Khimusniang ryngkat ka jingïatrei lang bad ka JF&EPA (Jaiñtia Fishing & Environment Protection Association,) West Jaiñtia Hills, ban ai jingïada ïa ka mariang kynthup ïa ki wah duid, wah myntdu, ki mrad khlaw, ki sim, ki doh um, kiba don hapoh u pud u sam jong ka shnong ka thaw baroh. Ka Dorbar Shnong Khimusniang ka la khang pyrshah ba ym shah ban khang jar/Tongsasi/Dat bom/theh dawai ïa ki doh um/kiba sait jaiñ bret Huggies, Diaper, bret jakhlia/khlong maw/sait kali bad pynjulor ha ka Wah Myntdu naduh Tre Ïongriang shaduh Band Moopiah bad lada lap ïa kino kino kiba pynkheiñ ïa kine ki kyndon aiñ kin sha summon da kaba kin siew ruh ïa ka fine 20,000/- tyngka bad ban ai ruh sha ki bor jong ka aiñ.
Ka Dorbar Shnong Khimusniang ka la pyntrei kam biang ïa ka Village Defence Party (VDP) kaba la ju don ha ki snem kiba mynshuwa, ka dei ka seng kaba la ithuh da ka sorkar ha ryngkat ka jingïatreilang bad ka Dorbar Shnong Khimusniang. Kane ka long ka jingpynbna paitbah ban husiar ba ka VDP kan trei ïa kam nangne sha khmat naduh ba la pynmih ïa kane ka khubor.