Riangdo, Ïaïong, 18: Ba la jur palat ka jingpynjot pathar ïa kid oh um doh wan, ha ka sngi palei, ki khlieh nongsynshar shnong jong ka thaiñ Mawshynrut ki la khot ïa ka jingïalang, ban ïakren phylliew jingmut kumno ban saiñ dur bad ïaleh pyrshah, halor ka jingpynïap pathar ïa ki doh um dohwah ha ki 13 tylli ki wah kiba kham heh kiba don ha ka thaiñ Mawshynrut.
Kine ki wah ki kynthup ïa ka Wahblei naduh Pyrden shaduh Nongmawlong, ka wah Riatham naduh Seiñduli haduh sdat Wahblei, ka Wahrynñiaw naduh shilliang Rynñiaw shaduh sdat Wahblei, ka wah Rwiang naduh Tiniang shaduh sdat Wahblei, ka wah Tyrsung naduh Mynñiar shaduh Tynghor, ka wah Baiu Thangtngaw haduh sdat Tyrsung, ka wah Kiang naduh ka shnong Mawleiñ Myndo shaduh sdat Wahryndi Garo, ka wah Riangsih naduh shnong Nongrimthawrat shaduh Nongjri Japung haduh sdat wah Riangdo Shallang, wah Riangdo naduh ka iew Riangdo shaduh Swangre Shallang, wah Riangken naduh Nongaswit shaduh sdat Kiang, wah Riangthiej shaduh sdat wah Kiang, wah Rongrin shaduh sdat wah Riangdo bad wah sdat Mynsaw naduh Photjalei shaduh Nongmawlong.
Ïa kine ki wah heh ba kham paw jong ka thaiñ Mawshynrut, la dep ban khang pyrshah ban pynïap pathar ïa ki doh um doh wah la ka dei ka siat bom ne ai dawai ne ki jyrmi kharu, ne electric current, ne kino kino ki jait jingpynjot.
Halor kane, ha ka sngi palei kaba dei 17 tarik mynta u bnai, ki trai shnong kin long ki volunteer ryngkat ki dkhot ba la dep jied ryngkat ki bor shnong, ryngkat ki bor hima kumjuh ki bor sorkar, la rai ban ïatreilang kawei ka sur ban rat diengkhong ïa ki nongleh kam sniew bad la da lap, yn ai ïaid beit ha ka aiñ jong ka sorkar, ki hima ki shnong bad ka Association.
La thaw ruh ïa ka Synjuk ban ïada ïa kine ki wah ïa kaba la tip kyrteng, “Ka Synjuk Nongsumar doh um doh wah Mawshynrut Block”. La jied ruh ïa ki nongkitkam ba kynthup ïa u Bah Gardinal Sohshang kum u President, Vice President Bah Evening Nongsiang, Secretary Bah Shemphanglin Marweiñ, Assistant Secretary Bah Aurelius Nongsiej, Treasurer Bah Bressell Paliar bad kiwei kiwei de ki dkhot ba kynthup ïa ki Adviser bad ki dkhot ki ban ïa tynrong lem ïa ka kam.
