Shillong, ïaïong, 15: U MP ka Rajya Sabha na Meghalaya uba long ruh u State President barim jong ka NPP u Dr. WR Kharlukhi ha ka sngi Baar u la pynbna ïa ka rai ba un shongthait noh kum u MP tang shu kut ka samoi treikam.
“Em, map ïa nga, nga la hap ban shongthait noh. Ki nongtrei sorkar ki shongthait ha ka rta 58 snem. Ha ka samoi ka ban sa wan, nga sa hap 70 snem, nga ngeit ba kiwei pat kiba dang kham samla kin mih bujli,” ong u Dr. Kharlukhi ha ka jingïakren bad ki lad pathai khubor.
Haba kylli, u Dr Kharlukhi u la ong pat ba ka shong ha ka party ban rai ïano ban jied na ka bynta ban mih bujli kum u kyrtong MP sha ka Rajya Sabha.
Halor ki jingjop jong ki thong treikam ka Sorkar MDA ha ki hynñiew snem ba la leit noh, u Dr. Kharlukhi u la ong ba ka Sorkar ha ka samoi treikam jong ka kynhun MDA-I ka la pynmih paidbah ïa ka kaiphod treikam shwa ban wan ka elekshon kiba pynpaw ïa ki jingjop ha kaba ïadei bad ka jingshna ïa ki surok, ki lynti ki syngkien, ki kam jngohkai pyrthei bad kiwei kiwei.
