Sohmynting, Jylliew 17: Ka Village Natural Resource Management Committee (VNRMC) ha ryngkat ka jingïatreilang bad ka Dorbar Shnong Sohmynting ha kane ka 11 tarik mytnta u bnai kala rakhe ïa sngi pynneh pynsah mariang ne ka ‘World Environment Day 2022’.
Ha kane ka sngi la pynlong ïa ka jingthung ïa ki tynrai dieng bad sam ruh ïa ki tynrai dieng sha ki skul bad kumjuh sha ki Balang hapoh jong ka shnong, la sdang ïa kane ka sngi lehkmen da ka jingïakop Drawing & Painting ba la shim bynta da ki khynnah skul ha ka por mynstep halor ka Theme “Only One Earth”.
Katba ha ka por 10 waje mynstep la don ka prokram jingïalang ha Community Hall jong ka shnong ba la pynïaid da u Chairman ma Heibormi Lyngdoh Chairman VNRMC la ïoh ruh ka jingklam pdiang pdiang na ka kong Prety Suting Secretary VNRMC
U ma Lam Pohktai District Officer Soil & Water Conservation Jowai kum u kongsan ula kyntu jur ïa ki nongshong shnong ba kin sumar bha ïa ka mei mariang, khnang ban lait na ka jingshit ka pyrthei ne ka Global Warming, ula ong ba donkam bha ban thung ïa ki dieng ki siej hapoh ka shnong ka thaw.
La ïoh ruh ka jingkren na u symbud kongsan ma Carmel Suchiang Range Officer Soil & Water Conservation Thadlaskein Range, uba la pynsngew ba donkam ban pynneh pynsah ïa ki dieng bad ba ym bit ban thang ïa ki khlaw lane pom pathar ïa ki dieng.
U Waheh Shnong ma Lephing Pyrtuh haba ai jingkren uba batai shaphang ka jingdonkam ban pynneh pynsah ïa ki sawdong sawkun jong ka mariang naduh ki khlaw ki btab bad ki mard ba bun jait bad kane kan urlong lyngba ka jingthung ïa ki dieng. Kiwei de kiba ai jingkren ki long u ma M.L Pyrtuh General Secretary Shnong bad u ma Ebormi Langshiang.
Ha kane ka sngi la sam ruh ïa ki khunsam sha ki nongjop ha Drawing & Painting, katba ïa ki kyntien ai khublei la ïoh na u ma Jerry Suting uba la ai ka jingïaroh ïa ki member jong ka VNRMC kiba la trei met bad mynsiem ban pynlong ïa kane ka porgramme kaba jop khamtam ïa ki khynnah skul, ki rangbah na ki Balang bapher bapher ki nonghikai, ki Aganwadi, ki ASHA, bad baroh ki ïa don bynta lang.
