Dawa ka VPP na ka sorkar ban thung jingtohkit laitluid halor ka jingjia ka elekshon ha JHADC
Shillong, Ïaïong 14: Ka seng kaba don ha ka liang pyrshah ka Voice of the People Party (VPP) ha ka sngi Nyngkong ka la dawa ban don ka jingtohkit kaba laitluid halor ka jingkynnoh ba ka sorkar bad ki bor pynïaid district ki la pulom ban pynlong ïa ka elekshon ha Jaiñtia Hills Autonomous District Council (JHADC) kaba khuid ba suba ha ka 21 tarik u bnai Rymphang mynta u snem.
Ha ka shithi ba la phah sha u chief secretary Bah DP Wahlang, u General Secretary ka VPP bad u MP ka Shillong u Dr Ricky AJ Syngkon u la ong, “Ngi kyrpad ïa ka ophis jong phi ban sdang noh ka jingtohkit kaba laitluid ha baroh kane ka jingjia jong ka elekshon kaba la long ha ka 21 tarik u Rymphang 2025 ha Wapung Skur A bad B, Bataw A bad B bad kiwei pat ki jingjia ha kiwei ki polling station bad balei khlem pynbiang ïa ki lad ai jingïada ban pynlong ïa kane ka elekshon ha ki artylli ki jaka ha Jaiñtia Hills Districts, ba kan long kaba khuid ba suba. Dei ruh ban pynthikna ba ki elekshon ban wan dei ban pynlong ha ka rukom kaba khuid ba suba.”
U Bah Syngkon u la ïathuh ruh ba lyngba ki jingtip ba la ïohlum ka Voice of the People Party ka la dep ban ithuh ba ki don ki polling station hapoh ki constituency kiba don ki jingma.
Ban pynthikna ban ïoh ïa ka elekshon kaba khuid ba suba na ka liang ka Party ha ka 14 tarik u Rymphang ka la kyrpad ïa District Election Officer, West Jaiñtia Hills District, Jowai bad District Election Officer, West Jaiñtia Hills District, Khliehriat ban pynbiang ïa ki lad jingïada, bad kane ka jingkyrpad ka long ban ïada na kano kano ka jingpyrshang ban pynthut ïa ka jingïaid beit ki kam elekshon.
U la kynnoh, “Wat hapdeng kine ki jingpyntip kam shym la don satia ka jingpynbiang ïa ki lad jingïada ba la leh da District Election Officer.
U la ong ba kine ki jingjia ba shah pynjulor ki EVM ka la wanrah ha ka jingpynlong biang ïa ka jingthep vote ha 4 tylli ki polling station – Wapung Skur A bad Wapung Skur B hapoh Musniang-Rangad constituency bad Bataw A bad Bataw B hapoh Bataw-Lakadong constituency.