Shillong, Jylliew, 16: Ka jingkiew dor jong ki mar bam mar dih bad nadong shadong naduh ba la wan lynshop ka khlam jingpang COVID-19 ha kane ka jylla bad ha ka pyrthei baroh kawei ka la pynlong ïa ki nongtrei ïing briew kiba don hapoh ka shatri jong ka All Meghalaya Domestic Workers Union (AMDWU) ban buh noh da ka dor bylla sngi kaba thymmai.
Ka All Meghalaya Domestic Workers Union (AMDWU) kaba ju trei ïa ka bha ka miat jong ki longkmie kiba ju im kamai jakpoh ban pyndap ïa ka ïing ka sem da ka kam bylla sngi ha ïing ki briew ka la rai ban dawa ïa ki nongaikam ban pynkiew noh ïa ka bainong sngi bad ha kajuh ka por ka la pynmih da ka Wages Card khnang ban pyntip sha ki paidbah ïa ka dor bai bylla sngi ka ban sa pyntreikam thymmai naduh ka 1 tarik, Naitung, 2022.
Katkum ka Wages Card ba la pynmih da ka AMDWU, ka bai sait jaiñ shi kynta ha ka shi sngi ka long T.2,500 shi bnai, ka bai sait tiar bad pynkhuid ïa ka ïing ka sem baroh kawei kan long T. 2,500 shi bnai na ka bynta shi kynta shi sngi, ka bai shet jingshet shi kynta shi sngi ka long T.3000 hajar shi bnai, ban leit buh skul ïa ki khun jong ki trai iing shi kynta shi sngi kan long T.3,000 hajar shi bnai.
Nalor kine, ban shu sumar kper, leit iew leit hat bad kiwei kiwei de ki kam na ka bynta shi kynta shi sngi kan long T.2,500 hajar shi bnai, ban ap khunlung rit lane ban sumar ïa kiba la tymmen (baroh shi sngi) na ka bynta phra kynta ha ka shi sngi kan long T.12,000 hajar shi bnai, ban trei kam iing baroh shi sngi na ka bynta phra kynta ha ka shi sngi kan long T.12,000 hajar shi bnai.
Katba ïa kiba sah shong trei ha ïing ki briew, nalor kaba trei baroh shitaiew kynthup kaba shong sngi bad ha ki sngi shuti ka dor kan long T.7,000 shi bnai bad kynthup naduh kaba pynbiang ïa ka bam ka dih, ka jaka sah bad kaba pynbiang ïa ki jingdonkam baroh.
Ban pynsngew ïa kine ki mat jingdawa, ki dkhot jong ka AMDWU ki la pynlong ka jingïaid paidbah na madan Iewrynghep, Laitumkhrah Shillong bad pynkut pat ha madan Malki, Shillong.
