Shillong, Jylliew, 16: U MLA jong ka KHNAM u Bah Adelbert Nongrum ha ka sngi Palei u la ïai ban ba ka jingthmu jong u ban resaiñ na ka kam President ka dei na ka daw ba u angnud ban wanrah biang ïa ka jingïasuk hapoh ka party bad ka kynhun ba la ïalam da u Bah Pyndap Saibon.
Haba pynshai ïa ka nongrim ba u dei u President jong ka KHNAM hapoh ka jingïalam jong u, u Bah Adelbert u la ong, “katkum ka shithi jong ka Election Commision of India (ECI) kaba la pynih ha ka 15 tarik, Naiwieng, 2018 la ithuh ïa nga kum u President jong ka KHNAM bad ïa ka ophis jong ka KHNAM ha Jaïaw Lansonalane. Haba thmu ban resaiñ na ka kam President nga pynshong nongrim ïa ka jinglong President jong nga halor kane ka shithi.’
“Halor katei namarba la don ka jingmudui da i Bah Pyndap hapoh ka Election Commission bad Ingbishar Meghalaya High Court, ka Election Commission ka la ai hukum ba yn ym ithuh ïano ïano u ban soi ïa ka Form A bad Form B ha por ba thep kyrteng ïakhun elekshon,” u la ong.
“Ka Form A bad Form B ka dei ka Form kaba u President jong kano kano ka seng u pynithuh ïa u kyrtong ïakhun elekshon kum u kyrtong ka seng ha ka por Elekshon. Namar ba don ka jingmudui halor ka jingithuh jong ka Election Commission ïa nga kum u President, ka Election Commission ka ai da katei ka hukum kaba la pynduh ïa u kyrtong na Mawryngkneng ban ieng na ka KHNAM,” u la ong.
“Kumba ka long mynta, nga shlur ban kam ba nga dei u President jong ka KHNAM namarba haduh mynta ka ECI kam pat pyndap ïa katei ka hukum ba la pynmih ha ka 15 tarik, Naiwieng, 2018,” ula ong bad bynrap, ‘ka jingthmu jong nga ban resaiñ kum u President ka long ha ka nongrim ba shai kdar ban wanrah ka jingïasuk bad ym na kano kano kawei pat ka daw.”
“Ha ka jingshisha ngi la dei ban pynkhlaiñ ïa ka seng hynrei ngi la shu ïa bunkam sah hajuh shihajuh bad ban shu ïa bunkam sah ban pynksan haduh la shu pynklumar jingmut sah ki paidbah. Kane ka jingpynklumar kam dei shuh ïa ka KHNAM nga ngeit phi ki paidbah phi tip kham bha ïano,” la ong u Bah Adelbert.
