Ngim lah ban pdiang ïa ka jingkhot kaba ngi ïoh lyngba ki lad pathai khubor: Pyndap

Shillong, Jylliew, 16: U President ka Khun Hynñiewtrep National Awakening Movement (KHNAM) u Bah Pyndap Saibon u la phah kyrwoh sha u MLA ka KHNAM u Bah Adelbert Nongrum ba ka kynhun kam lah ban pdiang ïa ka jingkhot kaba shu ïohi lyngba ki lad pathai khubor khlem kano kano ka jingïakut.
Haba pynphai nia kylla ïa ka jingpyllait khubor jong u Bah Adelbert Nongrum ha ka sngi Baar, u Bah Pyndap u la ong, “ka seng ka la ïakynduh ïa u Bah Adelbert Nongrum ha ka 25tarik, Lber, 2022, da ka jingthmu ban poi sha ka jingsngewthuh jingmut bad ha kane ka jingïakynduh, ngi ladep ban ïakren shai bad ïa rai lang ‘ba donkam ban ïa sngewthuh shwa ïa ki jingbakla baroh khnang ban poi sha ka jingïasuk bad jingbha,’ bad ngi la ai por kham kylluid ruh ban puson. Hynrei kaba sngewthamula ka long ba naduh katei ka sngi, kam don shuh kano kano ka jingïakren/jingïakynduh bad ngi shu ïohi ba u pynbna lyngba ki lad pathai khubor, ba un hiar shuki noh na ka kam President bad u la wer ïa ngi ban poi sha ka jingïalang ha iing sah jong u ha ka 17 tarik Jylliew 2022. Ka jingkylli kaba mih ka long kumno un hiar shuki President haba ka ECI kam ithuh ïa u kum u President,” ong u President ka KHNAM u Bah Pyndap Saibon.
“Kum ban shu pynkynmaw, ka ECI shwa ka Mawryngkneng Bye Election, lyngba ka shithi kaba 20 tarik, Risaw, 2021 ka la pynshai biang ba kam ithuh ïa u Bah Adelbert Nongrum kum u President ka KHNAM bad dei namarkata ba u kyrtong ba u la pynieng u khlem ïohlad shuh ban ïakhun na ka seng KHNAM,” la ong u Bah Pyndap.
“Hadien ka jingïakynduh kaba 25 tarik ngi la khmih lynti ba kan sa don ka jingïakynduh ban ïakren bad ngi la ïai ap ïa kata ka khubor hynrei ka khlem poi satia. Ha ka jingshisha, ka kam iing ladei ban pynbeit shwa ha iing ym ha surok lane ban shu pynmih khubor ïa kaei kaei ka bympat seisoh,” u la ong.
“Naduh u snem 2019 haduh mynta ngi la ïohi ïa ki jingkren ïalam bakla jong U MLA lyngba ki laid pathai khubor, ïa kaba ngi khlem sngewdonkam ban pynshai bad mynta ka kynti ruh ka la urlong kumjuh bad lehse kan sa donkam ba ngin hap ban pynshai khatduh khatwai ryngkat ki sakhi satar baroh,” u la bynrap.
“Ha ka MDC election 2019 ngi la pan jingmut, hynrei la shu shim tang ïa ka por khlem ka jubab bad khatduh khatwai u la ñiat beit sha ka CEC bad la pyndep ïa ka kam katkum ka riti treikam ka seng. Ki rai ki khlem kylla pyrdet hynrei ki la ïaid beit katkum ka jingsoi jong u MLA ha ka kaiphod jong ki Observer ka Election Committee. Ka long thamula ban ïoh sngew ba u dang mut ban mih ka KHNAM-A bad KHNAM-B, hato ym dong jingtip seh kaei lynti ban leit thaw Party thymmai bad kaei ka lynti ban leit kam President sopsop? Shwa ban leit sha ECI u MLA u la lum ïa ki EPIC jong ki 100 ngut ki paidbah bad leh Affidavit bad la thoh ba kine baroh ki la jied President thymmai ïa u, hynrei kine baroh kim tip haei la pyndonkam bakla ïa ki EPIC jong ki ruh. Wat kiba paw kyrteng ha ka CEC jong u MLA ruh kim don jingtip eiei, ïa kane baroh ngi lah ban pynshisha,” la ong u Bah Pyndap.
“Kum ka seng ngi pynpaw ka jingsngewlyngngoh bad ngi kylli na u Bah Adelbert ‘Katno sien phin resaiñ na kajuh ka seng?” U la resaiñ kum u Working President bad kum u dkhot jong ka CEC lyngba ka shithi kaba 10 tarik, Naitung, 2018, kumno pat u kiew kyrdan sha ka post President? Bad mynta pat u kwah resaiñ biang, kaei ka jingmut bad ka jingthmu? Ka long kaba eh ban sngewthuh! Ka long ruh kaba lyngoh ba ha kajuh ka por u la file case biang sha Meghalaya High Court (ïa kaba u khlem ïathuh paidbah) bad ha kajuh kapor u kwah kren ïasuk. Kaei kane?” la buh jingkylli u Bah Pyndap ïa u Bah Adelbert.
“Ngi ïohi ba haduh mynta ka dang mih ka jingkren na u MLA ba ka ‘ECI ka dang ithuh ïa u kum u President’ bad kane ka dei namarba kam don ka jingshemphang lane jingsngewthuh ïa ki shithi kiba u la ïoh pdiang na ka ECI bad kam don ruh ka jingsngewthuh balei ba u kyrtong ba u la pynieng na Mawryngkneng u hap ban ïakhun Independent,” la kynthoh u Bah Pyndap.
“Kumta kane ka jingthmu ban hiar na ka post President ka long kaba sngew thamula bad kaba jingïalam bakla, namar ka seng bad kumjuh ruh ka ECI kam ithuh ïa u kum u President,” u la bynrap.
“Ka jingkren jong u Bah Adelbert ‘ba ha ka 25 tarik, Lber, 2022 ka don ka jingdawa ban hiar shuki President ïa u, ka long ka bym shisha bad ka bym don nongrim, namarba ha kane ka jingïakynduh ka phang ka long ba donkam tang ban sngewthuh shwa ïa ki jingbakla khnang ban poi sha ka jingïasuk. Namar kata kum ka seng ngim lah ban pdiang ïa ka jingkhot kaba ngi ïoh lyngba ki lad pathai khubor khlem kano kano ka jingïakut,” u la ong.
“Kane kam mut ba kan ym don ka jingïasuk nangne shakhmat, hynrei ka jingkhang ka plié. Ban pynurlong ïa kane ngin sa phah ka jingthoh kaba biang ryngkat ka jaka ka tarik bad ka por kaba kylluid bad kaba ïa biang lang sha u Bah Adelbert Nongrum khnang ban ïoh ban ïa phylliew jingmut bad ngi kyrmen ba yn da la mih na kane ka jingïakynduh ngin ïoh ïa ka khubor ba thiang na ka bynta ka jingmyntoi ka seng hi baroh kawei,” la pynkut u kyrwoh.